Justin Bieber-i nisung ka dak tekolak agi atong

February 17, 2017 (Agencies): Justin Bieber anogo ishika tsüngda nung ozüng alema mapa inyakba ana tashi nung shilem agiba angazüker. Olulu ajanga ashiba agi, taoba hopta Los Angeles nung Grammy matong tsüngda party ka nung pai nisung ka dak tekolak agi atong.
Honibar anepdang züngia lia chic restaurant Serafina nung Bieber nisung ka den mangatettep adok. Iba party ya pa indang production partner Jason ‘Poo Bear’ Boyd-i ayongba liasü. Bieber aser pa medemer Kyle Massey na asayatepa aliba nisung kati video agi tenzük, iba ajanga Bieber mepelai aküm, ta osang ka ajanga metetdaktsü.
Iba party nung pai video agia aliba nisung dang jagi oa video delete asütsü asoshi ashi, saka kodang pai video delete asütsü memulung Bieber-i pa dak tekolak agi tongoktsü. Restaurant nung inyaker kati 911 call asüba sülen police aru, saka iba mapang nungbo Bieber iba tesem nungi oadoker liasü.
Osang ajanga ashiba agi, nisungbai iba da sendakba nung ken o benoktsü asoshi kecha bilema mali, saka police temi iba ken o bushisüngdangdar.
Maneni osang balaka nung Serafina kiburi, “Bieber aser par medemer asaya kazüba dang liasü. Bieber aruba shia onok kanga pelatepa kazür,” ta osangbenertem dang ashi.
Iba tatalokba Cleveland hotel kima 2016 küm raratepba nung Bieber-a temulung melemi bilemertem rongnung züngsemba sülen atalok. Ita 8 lir külen nisung ka formal channels kima Bieber den iba ken o jembitsü asoshi aru. Pai ashiba agi, iba küm 22 tain kentener dena June 8 nü NBA final atemba sülen raratep.
Küm anashi alima tsüngdang pa melenshiba sayutsü asoshi Bieber-i takok tashi ajemajema lia aru, saka iba osang anogo ka ana tsüngda nung angashiba ajanga pa temerangdangba amajok kümdaktsütsü südi.