NTAC-i Zeliangrong Baudi Nagaland nem jangjashitsür

Dimapur, Febraury 17 (TYO): February 17, 2017 nü osangkakettem nung Zeliangrong Baudi Nagaland-i sangdong ka ajanga Tribal Hoho tem aser Nagaland nung kin balala ajak longjemer sabang ka nung ken o jembitsüla aser tang tensa ya democracy yimya nung bentettsüla, ta sangdongbaji JCC aser NTAC nati züngzünga agiogo, ta tanü NTAC Media Cell, Kohima-i sangdong ka ajanga metetdaktsü.
JCC aser NTAC nati tang tensa indang otsü tarensen rasaa ashitsü menüngdak, kechiyong itemji osangkakettem nung aiben lepshia adokogo. Naga nungeri Naga nunger temetentem kümzüka ayutsü atema nokdaker, ta Zeliangrong Baudi-i jangjajangja angatettsü nüngdak,” ta NTAC Media cell-isa metetdaktsü.
“Anungji nenok tentetji atangji chichiba Naga Tribal Organisation ka süra, nenoki tanüngba Naga nunger tribal tentettem den adentsüla aser January 31, 2017 nü tai maket nisungtem tepsettsü aser aika yirutsütsü atema tetuyuba agütsüsang, Nagaland Chief Minister, TR Zeliang anema mera agitsü atema tangsa akhangtsüla,” ta sangdong nungsa shia lir.
“Lendong matalokdang yongi Nagaland Chief Minister, TR Zeliang-i nüburtem ola anga asübo tanü iba tensa ya matalokla. Anungji print media (osangkakettem) nung adoktsütsü atema dangbo menüngdakba otem madoktsütsüla, koba ajanga tai inyakertem pusemba atema nenok tentet ang maneni aitsütsü,” ta Media Cell NTAC, Kohima-isa metetdaktsü.