Manipur election sülen Irom Sharmila kibong akumtsü

Imphal (Manipur), February 17 : Meimchir temeten atema nokdaker, Irom Sharmila-i March ita nung Manipur assembly elections tembangba sülen kibong akumtsü tebilemba lir, ta osang ka ajanga metetdaktsü.
Brihostibarnü Imphal nung osangbenertem den jembidang Sharmila-i iba osangji metetdakja liasü.
2000 küm November 4 nü Sharmila-i Armed Forces (Special Powers) Act, 1958 agientsü atema takhangba agüja lumi tenzüka liasü, aser yaküm August ita nung tembang.
Goa nungi NRI, Desmond Coutanho aser Sharmila na mapang talangka nungi meimtepa arur, aser la local court-i aoba mapangshia pa Imphal-i ilongasa arua liasü.
Mapang ka nungbo court telung nung pai Sharmila dak teka nung amba ajanga court kima tetsür telok kati pa dak züka liasü.
Iba dak sentakba nung tetsür kati, “Manipur nungbo lokti nung ibaji (tetsür-tebur teka amtepba) memelar,” ta ashi. Iba sülen nungi Coutanho-i Imphal-i marur.
Manipur state-i bendangertem nokdangtsü atema Inner Line Permit system akhanger, aser karibo Coutanho aruba aser tepuokdak Sharmila nem phone aser laptop agütsüba atema tasüngdangba kaogo.
Iba tatalokba sülen Coutanho-i osangbenertem aser meimchir temeten atema inyakertem anema jembia aru.
Coutanho yimya atema tatok meshija yashi Sharmila-i, “Desmond tenüng nung ni tatok meshir,” ta ashi.
Sharmila-i Manipur assembly election nung Thoubal constituency nungi tokteptsü atema yashi tenüng agütsüogo.
Lai Congress candidate aser state Chief Minister, Okram Ibobi Singh den tokteptsü. Election nung tokteptsü atema tatemsabuba anogoji Brihostibarnü liasü. State nung March 4 aser 8 nü election agitsü.