Dimapur nung nisung ka dak azük

Dimapur, February 17 (TYO) : Hokolbar nikongtsütsü 5:00 ako meta Dhobinalla tesem nung injang kahdok ta olulu kar jembiba sülen nisungtem taoksa nung jenshi aser dokan kiburtemia dokantem shibanga liasü.
JCC-i ayongba mokdang nikongtsütsü 4:00 ako nung tembangba sülen, shishilembartem dokantem lapoker shishilembatsü tenzük, saka taonung 5:00 ako meta GS Road, MP Road aser Deluxe Point nung langkaka atalok ama nisungtem jenshi.
Iba mapang, nisung kari Dhobinalla nung lungkak aitba lanur telok ka senshidaktsütsü atema injang kahdok ta olulu jembitsü tenzük.
Ajisüaka, iba tatalokbaji tanep Zeliangrong Village nung dokantem lapok ta temulung melemi bilemba sülen mangatettep ka adokba den sendaktepa liasü.
Dhobinalla police point nung mapa lemzükba volunteer kari tanep 10:30 ako meta Zeliangrong village (ZV) nung lanur kar merenshi.
Iba mapang mokdangertemi lanur ka dak kanga mejungi azük aser ano tetsürtem dena nisung 5-6 ka dak teka sangshi.
Yirua aliba lanuri ashiba agi, volunteer kari lijak amshia mapa tamajung inyaka liasü aser iba jagi pai parnok dang iba ama mapa meinyaktsü ashi. Ajisüaka, idangji nisung telok kati pa dak azük aser idangji pa tekolak nung zübo keta yirutsü.
Iba mapang pa tedi aser tetsür kari rara bendangtsü atema ao saka mokdangertem parnok dak teka sangshi aser tetsür ka tetsüng nung lijak agi akah. GBs aser taintem kar arua iba mepetmesü sünemdaktsü.
Bandh volunteer temi ashiba agi lanur jagi tamasa rara mena aser iba jagi parnoki teka sangshitsü aküm, ta osang ka ajanga metetdaktsü.
Raratepba osang angazükba sülen police tem tesem tonga aru aser yirua alirtem dang osang metetpelaogo.