Kabul-i Islamabad dang kiralongrar anema nokdaktsü ashir

Kabul, February 18 (Agencies) : Honibarnü Afghanistan sorkari Pakistan dang yimjung inyakyim ajanga kiralongrartem samatsütsü merangdi ta shiogo.
Afghanistan Presidential Palace-i, Afghanistan aser Pakistan linüktemi longjemer kiralongraba anema raratsüla, ta sangdong ka ajanga ashiba osangbenertemi metetdaktsü.
Pakistan Sindh province nung Lal Shahbaz Qalandar tekülem ki taküm bendanga agütsürtemi maka nisung jenti azüdokshiba sülen parnoki iba sangdong metetdaktsü.
Iba tatalokba atema Jamaat-ul-Ahrar telungpur dak tai tongloktsüogo. Jamaat-ul-Ahrar telok ya 2015 küm IS telok den lungjemer inyaktsü asoshi tenangzüktep agiogo.
Pakistan nung kiralongrartemi lendong agütsüba ajanga Afghanistan dena anokshir anungji Pakistan-i iba amala tatalokba tangsa nokdang nung ajungtsü ta Afghanistani bilemer.
‘Peace Quartet’ tanangzüktep ayubaji tang ya Pakistani mapa küma inyaka sayutsü mapang lir ta Afghanistan-i ashi.
Afghanistan linük nung yimjung akatsü asoshi January 2016 nung Afghanistan, Pakistan, US aser China linüktem senteper Quadrilateral Coordination Group (QCG) inyakyim tenteter iba inyakyim kübok Taliban dang Afghanistan sorkar den olemtep kaa yimsüsüba tsütsü tebilembatem lemsateptsü ashi.
Iba sülen QCG-i Afghanistan sorkar aser Taliban telungpur na tsüngda Kabul nung ajurutepa yimjung atema jembitsü lenmang bushitsü asoshi senden tanabuba ayonga amen.
“QCG-i linük koba nungi südir süaka parnok tesem nung kiralongrar telok ajak samatsütsü asoshi bendanga agüja inyaktsü tebilemba lir,” ta QCG sangdong ka ajanga metetdaktsü.