ZB-i tang mokdang ya kin onük mekümdaktsütsüla: JCC

Dimapur, February 18 (TYO): Tang yimtenren tensa aser Naga nungeri longkak aita mokdangba ya Zeliangrong BAUDI (AMN)-i kin sasep onük ka kümdaktsüba ya tesasatsüka alir, ta tanü Joint Coordination Committee (JCC) Media Cell-i sangdong ka ajanga metetdaktsü.
JCC aser NTAC nati, tang mokdang nung ya yimtenren onük mesüra kin anema kecha mali mesüra nija anema inyakba mali ta aiben shia arur, ta sangdong nungsa shia lir.
“Zeliangrong Baudi (AMN)-i, iba ya Naga nungeri Naga nunger temetentem atema longkak aita nokdakba aser yimtenren mesüra kin telemsa kecha makai Naga nunger meimer ajak longjemba ama mereprangteter, anungji JCC-i Zeliangrong Baudi (AMN) dang, iba tia maka tensa ya NPF sorkari ashioktsüba aser T.R. Zeliang-i kijai tashi amshiba yimya ajanga lir ta jangjashitsür. Tamalena tensa meraksadaktsüi aser nüburtem nem timtem magütsüi khuret agia Nagaland Chief Minister aser Minister-i peisasa anenba tatalokba lir ta jangjashitsür,” ta sangdong nungsa shia lir.
“Zeliangrong Baudi (AMN)-i, T.R. Zeliang’er ki kümzüktsü atema longkak aitertem dak akah, ta jembibaji khenyongi tai lir, kechiyong longkak aitertem dak akahbaji TR Zelaing’er ki anasa masü saka Highway nung akah,” ta JCC Media Cell-i ashi.
“Zeliangrong Baudi-i Naga nunger atema Naga nunger meimer lanur tebur asem asüba dang nungibo par kin nungi CM menden makai akumba atema ang tali tebilemtsü akar ama reprangteter, ibaji shisa maka aser aitsütsü tetemsü,” ta sangdong ajangasa ashi.
“Zeliangrong Baudi dang ano lepshia, kin nung ajemdaker yimtenren maitdaktsüi parnok tajangzük atema kin ajak longjemba nung ranglokdaktsüner; Naga nunger nükjidong dang nungi Chief Minister mendenji taoba masü,” ta JCC sangdong nungsa shia lir.
“TR Zeliang-i tashioktsüba mapa ajanga senti taküm asem samabaji Nagaland tesem ajak nung Naga nungeri jashir, pa ya Zeliangrong nunger atema dang masü saka Naga nunger ajak atema Chief Minister lir,” ta parnokisa ashi.
Asüng amongnü, Deobar asünungji mokdang malitsü, ta Joint Coordination Committee (JCC) Media Cell ajangasa metetdaktsüogo.