Akhil Kumar aser Jitender Kumar na ‘Pro Boxer’ kümogo; April 1 nü mezüng tsüngteptsü

February, 18, 2017 : Tsüngteper Vijender Singh tsüngnep nung anidaka, tesüiba mapang Commonwealth nung gold medal angusang Akhil Kumar aser Asia nung medal ngua alisang Jitender Kumar na professional boxing nung shilem agitsü renema lir. Tanaprongla April 01, 2017 nü Mumbai nung Pro Boxing nung tang mezüngsüa tsüngteptsü.
Tsüngteper anapronglai taküm trokbenben tsüngteptsü aser mezüngbuba tsüngtepdang round pezüzü tsüngteptsü. Akhil aser Jitender naprongi 2008 Olympics mapang kanga junga asayatet aser tang-a ano April 01 nü Mumbai nung mezüngbuba tsüngteper mongin kaka ama tsüngteptsü renema lir.
Akhil super lightweight telemsa nungi aser Jitender super featherweight telemsa nung tsüngteptsü.
“Küna joko mapang tatsüka training agia arur. Onok mogin tsüngteper ka ama mezüng tsüngteptsü ita ka shiang lir, ajisüaka künati melamela yimya sübatsü aser taginüba tongtettsü,” ta Akhil-i ashi.
“Ni teti Akhil-i len anir, küna medoktsüi yariteper. Ni iba ya mapang tajung ka tenzüker asütsü amanga atar,” ta Jitender-i ashi.
Haryana nunger anaprongi mezüngbuba IOS Boxing Promotions pur den Honibarnü sign sütep. Akhil aser Jitender naprong ya tesüiba mapang Asian Championships nung bronze-medal angurtem lir aser tang tena Haryana Police nung DSP kaka lir. Tenati depertment dang temelaba agir külen pro boxer aküm.
Tena nem Gurgaon nung IOS-i lapokba academy ka nung training agütsütsü aser ibaji atema Manchester nungi trainer ka tan ita tatemlen arua atongtsü.
“Akhil aser Jitu nata Vijender sülen tsüngteper tajung kaka lir aser parnok nem Manchester nungi aruba trainer kati tesayuba agütsütsü,” ta IOS MD Neerav Tomar-i ashi.
“Tena trokbenben tsüngtepba rongnung ananabo international alitsü. Onoki tena asoshi sentong tulu yanglua lir aser tena nem bendanglena oa training agütsütsü,” ta pai shisem.
April 01, 2017 aonung WBO Asia Pacific Super Middlweight champion, Vijender-a WBO Oriental champion aser China nung No.1 Zulpikar Maimaitiali den tsüngtepba angutsü. Tena rongnung shibai kokdir tenaprong indang belt agitsü.