NTAC, Kohima-i Angh nem shidi ka agütsü

Dimapur, February 18 (TYO): Chief Minister T.R Zeliang-i February 16, 2017 nü shidi ka nung pa menden toktsütsü atema anogo ana-asem ka agüjang ta mepishia zülu. Ajisüaka, February 19 nü anogo asem ajungtsü liaka, pa menden metoktsür, ta tanü NTAC, Kohima-i Nagaland Angh P.B.Acharya dang shidi ka nung metetdaktsüogo.
T.R Zeliang-i NTAC Convenor dangi züluba shidi nung nangzükba ama mapa meinyaker, ta NTAC-i Angh dang ashi.
Nübortemi temeten asoshi inyakba sentong ya JCC aser NTAC nati ketdangsüa inyaker. Sorkari ULB indang elections agitsü lemtetba sülen lungkak aitdang police-i Naga nunger lanur asem taküm samatsüba, aika yirutsüba aser ano sorkar ketdangsübaren inyaka moutetba atema JCC aser NTAC-i Chief Minister dang tebilemtsü khuret bena, menden tokjang ta takhangba agütsür.
“February 18, 2017 nü NTAC senden ka amendang, iba onük atema kanga junga olemtepogo aser senden nung adenertem ajaki nü den iba onük lemsateptsü aser Chief Minister-i menden metoktsü tashi tanga mapa kecha meinyaki atatsü mepishitsü lemtet” ta NTAC-i Angh dangi züluba shidi nung shia lir.
Angh-i iba onük züngzünga agitsü aser tanga onüktem sendaka maodang teinyaktsü mapa inyaktsü imlar ta NTAC, Kohima Convenor, K.T. Vilie-i shidi nungsa shia lir.