Anogo 6 buba Dimapur tiptema mokdangogo

JCC-i Tanü tenokdangba salatsür

Dimapur, February 18 (TYO): JCC aser NTAC nati Chief Minister T.R Zeliang dang menden tokjang ta takhangba agüja lungkak aittsü tenzüker Dimapur nung tanü agi anogo trokbuba takok ngua mokdangogo.
Ajisüaka, state kübok tesem kar nungbo sorkar office tem melapokdaktsüba aser garitem mesenzüdaktsüba dak alaka mokdangba salatsü.
Dimapur nung tanep 9:00 ako nungi nikongdang 3:00 ako tashi tiptema mokdangogo. Mokdang mapang central office tem dena sorkar office tem, shishilembadak, bank aser shisaliok rejutem ajak shibanga liasü.
Nagaland nung tensa tajungba akümtsü aser yimjung lidaktsütsü atema tanep Dimapur Ao Baptist Arogo (DABA) kübok Women Ministry-i mokdang nung shilem agirtem den sarasadem mapang ayongzüka agi. DABA Women Ministry-i tanep Dimapur jila nung tongtipang tesem ajak sema sarasadem mapang agi.
JCC-i sangdong ka nung ashiba agi, Deobar (February 19) nü Temeshi Amongnü asübayong mokdang malitsü ta metetdaktsüogo. Ajisüaka, state sorkar nungi telangzüba tajung mengura, mokdang sentong maneni alitsü ta parnokisa metetdaktsüogo.