TN Angh-i Assembly osang tejangja meshir

Chennai, February 19 (Agencies) : Tamil Nadu Angh, Ch Vidyasagar Rao-i Assembly secretary A M P Jamaludeen dang Honibarnü House nung atalokba osang tejangja agüjang ta tetuyuba ka agütsüogo.
Edappadi K Palaniswami sorkari Assembly nung ‘trust vote’ agitsü benoka agidang mepetmesü atalokba atema Angh-i osang tajangji meshi.
Tanü Deobarnü ya Angh Ch Vidyasagar Rao atema kanga dang mazüngba anogo ka liasü, kechiyong pai Raj Bhavan nung telok asen den ajurutepa sendentem amen.
Tanü pai mezüng chief minister Edappadi K Palaniswami den ajurutep, iba sülen party working president M K Stalin tenüng nung DMK Rajya Sabha züngsemtem den ajurutep aser tatemsa O Panneerselvam-i aniba telok ka den ajurutep.
Palaniswami-i Angh den ajurutepbaji ‘courtesy call’ ka dang liasü ta osangbener dang ashi. Ajisüaka, DMK telokibo Angh dang Palaniswami-i State Assembly indang temzüng alema ‘vote of confidence’ takok angu anungji ibaji meyipa agiang ta takhangba agütsü.
Honibarnü Assembly nung DMK aser OPS’er teloki Speaker dang trust vote atema ‘secret ballot’ amshiang ta asüngdang saka ibaji Speaker-i magizük.
Iba sülen opposition tongti DMK telok den parnok teyaritepertem medeni ‘trust vote’ agitep.