Governor-i TR Zeliang CM nungi anenba shidi agizükogo ; Shurhozelie CM asütsü renemshi

Kohima, Feb. 19 (TYO) : Deobar aonung menur ka T.R.Zeliang-i pa chief minister menden nungi anenba shidi ka Nagaland governor nem agütsüogo aser governori iba shidiji agizükogo.
Ajisüaka, pa melen chief minister tasen ka meshim tashi pa aser par kilonser tazüngpurtem mapaji maneni bena liang ta governor-isa metetdaktsü.
T.R.Zeliang melen DAN tatartem rongnung ajaki mulungba nisung ka Chief minister asütsü atema shimtsü asoshi Hombar nü senden jazüka lir aser iba senden nung NPF tatartemi NPF tir Shurhozelie shimtsü parnok telong nung lemtetogo ta angazüker.
Anogo asem jakdang NPF tatar 42 longjemer T.R.Zeliang melen Shurhozelie CM agitsü asoshi shidi ka angh nem agüja lir aser iba kasa terenembaji Deobar nikongdang NPF tatartemi renemshia yuogo ta angazük.
NPF tatartem rongnung karibo tang Lok Sabha MP aser taoba chief minister, Neiphiu Rio shimtsü shidanga lir, saka tang pa NPF party nungi anenja (suspended) alinungji tangbo pa shimtsübaji tasak akümer ta angazüker.