Karolina Pliskova-i Grand Slam akoktsü nükla ayur

Doha, February 19 (Agencies) : US Open asayamung nung final tashi tua asayatetla, Karolina Pliskova-i, Honibarnü Qatar Open akokba sülen Grand Slam ka akoktsü kü nükla lir, ta ashi.
World No. 3 Karolina ya yaküm US Open final asaya nung Angelique Kerber-i akok saka lai 2017 küm WTA title ana tashi koka la sempet sayuogo.
Arishi küm 23 tain, Karolina-i, taküm Wimbledon aser US Open nung takok angutsü meranga asayatsü, ta ashi.
Doha nung 6-3, 6-4 agi Caroline Wozniacki madak takok anguba sülen la World No. 1 akümtsü nükjidong lir asü ta asüngdangdang, lai la nükjidong tanga ka lir ta langzü.
“Ni tang World No. 1 akümtsü masü saka nükjidong tanga kar lir, aser ibaji ni Grand Slam ka tanga kokner. Ni yaküm final tongtetogo anungji ni tanbo final nung takok nguner,” ta ashi.
Ni tang Wimbledon nung takok anaben angur coach ka den lir, anungji pai ni yaritettsü akok, ta 2011 aser 2014 kümtem nung Petra Kvitova Wimbledon ana nung takok ngudaktsüsang coach David Kotyza atema jembidang ashi.
“US open jibo kanga saaker asütsü anungji ni yangji kanga meranga asayatsü,” ta lai ashi.
“Ni takümsa Grand Slam kabosa bener. Mabenka asüyonga taruba kümtem nung abentsü ni atema maongka peria lir,” ta lai shisem.
Lai Wimbledon marok abentsü kanga imlar ajisüaka Pliskova-i All-England Club nung teti kanga mejunga asayateter. Lai 2013 küm WTA marok ka benaka aser 2015 küm nungi top 10 rongnung züngoka liaka taoba küm pezü tsüngda nung la round tanabuba nungsa tsükatok.
Yaküm Wimbledon nung tamakok anguba sülen Pliskova-i Kotyza den lungjem.