2018 nungi Russia-i India nem helicopter agütsütsü

Moscow/New Delhi, February 20 (Agencies): 2018 küm nungi tenzüka Russia-i India nem military helicopter agutsü tenzüktsü, ta Hombarnü linük indang manufacturer Russian Helicopters chief executive-i metetdaktsü.
Yaküm October ita nung India aser Russia nati senteper Indian Armed Froces atema KA-226T helicopter 200 yanglutsü tezüngzüktep agia liasü.
India-i armed forces tashi taitba akumtsü atema inyakba aser nuclear industry ka amenoktsü atema aser Russia-i sen intoka shishitsü atema market bushiba dak sentakba nung linük anapronglai energy aser defence nung amalitepa inyaktsü bangjemogo.
“Senteper inyakba maparen tang teinyakdak lir, aser mezüng helicopter delivery ji 2018 küm tenzüktsü. India nung After-sales service-a agütsütsü,” ta taküm January ita nung CEO akumsang, Andrey Boginsky-i metetdaktsü.
India nem helicopter 60 shi agütsütsü aser tanüngba helicopter 140 ji India nung yanglutsü, ta Abu Dhabi nung International Defence Exhibition alidang pai metetdaktsü.
Iba company-i advanced medium multirole Mi-171A2 helicopter yanglu tenzükogo aser China-ia Mi-171A2 alitsü jangraba sayuogo, ta paisa metetdaktsü.
“Taküm onoki helicopter 220 ayoktsü imlar,” ta paisa shisem.
2016 küm iba tayimtsü 190 yoka liasü.