‘Framework agreement’ onük nung AMSU-i longkak ait

Imphal, Feb. 20 (Agencies): Union Home Minister, Rajnath Singh-i jembitsü aliba, assembly election nüboyim sentong ayongzükba tesem anasa Deobarnü Imphal nung All Manipur Students’ Union (Amsu) züngsemtemi longkak aita liasü, aser parnoki Centre sorkar aser National Socialist Council of Nagaland (Isak-Muivah) na tezüngzüktep agiba ‘framework agreement’ indang osang tejangja agütsütsüla, ta takhangba agütsü.
Union Minister Rajnath-i assembly election atema BJP indang ‘vision document’ sayatsüdang Amsu züngsemtemisa Manipur Film Development Corporation auditorium, Palace Gate nung longkak aita liasü.
Longkak aitertemi ozülu nung, “Manipur telongjem nung yimtenren maitdaktsütsüla,” ta bener longkak ait.
Ajisüaka Police-i longkak aitertemji DM College gate adena meyok. Iba college ji Thangmeiband nung Thau ground anasa lir, kong Rajnath Singh-i lokti senden nung jembia liasü.
Osangbenertem den jembidang Amsu secretary general, Manjit Sarangthem-i, “Home Minister-i, ‘framework agreement’ nungji Manipur, ta tetshia mali ta jembibaji onoki mamangteter,” ta ashi.
“Kechiba Centre-i iba agreement ji nüburtem nem memetetdaktsür?” ta paisa asüngdang.