Pul-i aija zülua aliba ochimashirtem bushitsü asoshi Centre dang asüngdanger

Itanagar, February 20 (Agencies): Arunachal Pradesh nung taoba Chief Minister, asür, Kalikho Pul-i pasasa soseta asütsü mapang zülua yutsüba ‘Mere Vichar’ nung sorkar ketdangser telok balala nungi ochimashir tetshia aliba tenüngtem bushisüngdangtsü asoshi Union Home Ministry dang asüngdangtsü asoshi Arunachal Pradesh sorkari lemtetogo.
February 8 nung ‘The Wire’ ajanga osang sangdongba nung inoka aliba ‘Mere Vichar’ ya February 18 nung Chief Minister Pema Khandu mendenbuba ser amenba cabinet senden nung jembi aser, “News portal nung ‘Mere Vichar’ ya scan sür inoka lir aser iba document nung tenüng karbo tanak agi tepbanga lir aser yimden yimsüsür aser lenir kar tenüng inoksema lir,” ta parnoki metetdaktsü.
Pul-i züluba shidi ya pa mezüng kinungtsü, Dangwimsai Pul-i 2016 küm August 9 nung Kalikho Pul temang den külemi Chief Minister aliba ki nung angu.
Iba tezüluba ya Itanagar Capital Complex nung aliba Chief Judicial Magistrate (CJM) indang court-ia India sorkar indang Home Ministry dangi bushisüngdangtsü asoshi abentsü molungogo.
Iba senden nung Pul ajungbena asüba asoshi temolung shiranga tenzük saka pai ‘Mere Vichar’ nung ochimashi tai tonglokja aliba ya tiyazü lir, ta ashi.
Pul indang PSO, Surendar Kumar Rai-i benokba ajanga Itanagar police station nung 174 Cr Pc kübok case 14/2016U/S züluokogo.
“Mere Vichar indang copy pongu densema document aika magistrate-i ngutet aser parnoki police nem 2016 küm August 10 nung agütsü. Iba document nung ya ‘Mere Vichar’ shidi ya jungjunga shibanger agütsü. Iba shidi ya police-i bushisüngdangba mapang lapoka reprang, saka Pul asütsü tebilemba mesüra tangar aija züluba kecha meliasü aser iba shidi ya CJM nem agütsü aser dang court nung lir,” ta cabinet-i ashi.
‘The wire’ ajanga February 8 nung sangdongba sülen, Pul kinungtsü Dangwimsai-i Itanagar nung osangbener den senden amenba mapang, Chief Minister, Khandu aser Deputy CM, Chowna Mein menden nungi alutsüla aser CBI ajanga iba ken o bushitsüla, ta takhangba agütsü.
“Ozü kinungertemi ashiba nung masü saka PSO-i ashiba nung ajemdaker police-i ken o züluok,” ta lai police tema aija ashi. Tang la India Ato Kilonser, Narendra Modi ajurua iba ken o nung tiyongi ia la nem obendang agütsütsü teyari meshitsü asoshi New Delhi nung lir.