Egypt stadium nung azütokshiba atema nisung 10 alenseta südaktsütsü

Cairo, February 20 (Agencies) : 2012 küm stadium ka nung nisung 74 tepsetba lendong dak sendakba nung Hombarnü Egypt okadak kati nisung 10 tashi alenseta südaktsütsü obendang agütsüogo.
Iba küm Port Said nung asürtem indang kinungertemi Cairo nung aliba Court of Cassation kima tasürtem indang noksa bener aru nokdak, ta osangbenertemi ashi.
Iba azütokshiba lendong ya February 1, 2012 nü Port Said nungi al-Masry soccer club aser Cairo nungi al-Ahly telok na tsüngda asayadang atalok.
Telok anaprong pusemertemi kotari, noklang nok, süngsü, long aser bottle tem amer raratepdang nisung 74 tepset aser nisung 200 tashi yirutsü.
Iba dak sendakba nung Port Said criminal court-i June 2015 nung nisung 11 alenseta südaktsütsü obendang agütsü. Obendang agütsüdang parnok rongnung kabo okadak maliasü.
Iba lendong dak sendakba nung nisung 73 tashi okadak nokdakogo. Panok rongnung nisung 21 dak tai meputet, saka yimsüsür aser saisapong ketdangser tejen kar küm ishika tepuokdak ayutsü obendang agüja liasü.