Dr. Shurhozelie Liezietsu-i TR. Zeliang melenzüktsü; Feb 22 nü tenangzükba agitsü

(Abelen) Chief Minister menden toktsür T.R Zeliang-i Dr Shurhozelie Liezietsu den pa DAN Legislature Party lennir shimba atema tepela sayua salemba angur. (Achiji) Dr. Shurhozelie Liezietsu den T.R Zeliang aser Cabinet züngsemtemi tanü Nagaland Angh, P.B. Acharya den ajurutepdang agiba noksa angur. (Kohima, February 20)

Kohima, February 20 (TYO) : Hombarnü Democratic Alliance of Nagaland (DAN) legislature party lennir asütsü atema yimten lennir tejen Dr. Shurhozelie Liezietsu shimogo aser pai February 22, 2017 anepdang 11:00 ako nung Nagaland Chief Minister 17 buba inyaktsü atema tenangzükba agitsü.
Tanep State Banquet Hall nung DAN Legislature Party senden nung Dr. Shurhozelie lennir asütsü shimtet.
Pa DAN Legislature Party lennir asütsü shimba sülen, tanü nikongdang 3:30 ako nung MLA temi Nagaland Angh, P.B. Acharya den ajurutepa sorkar tasen kümtettsü kuli agütsü.
Tanü Nagaland Angh, P.B Acharya den ajurutepdang Dr Shurhozelie den taoba chief minister TR Zeliang aser Cabinet züngsemtem dena liasü.
Angh-i Dr Shurhozelie ji DAN legislature party lennir ta agizük aser February 22 nü tenangzükba agitsü atema jaok, ta tanü Raj Bhavan sangdong ka nung metetdaktsü.
TR Zeliang-i Naga nunger tensa tamajungba moudaktsütsü atema pa menden toktsütsü bendanga agütsüba atema arishi küm 81 tain Dr Liezietsu-i pa nem tenüngsang agütsü.
“Pai kanga dang aria bilemja iba telemtetba agiogo aser pai bendanga agütsüba atema ajaki tenüngsang agütsütsüla” ta tanü DAN legislature party lennir shimba sülen o jembidang Dr Shurhozelie-i ashi.
“Tsüngremi mulungra aser nenok ajaki pusema nungitba ajanga ni asen lima aser lokti nung tensa süngjemdaktsütsü atema kü akokba tashi inyaktsü merangtsü. Nagaland tenüng nung teraksa aika nguogo aser tesüiba hopta ishika tsüngda asen rongrensen tsütsü takoksa jenti ajuruogo, saka Nagaland nung aliba nübortemi tangatetba tajung nung asen loktiliba yanglushitsü ta ni imlar” ta paisa shisem.
“Ni Chief Minister aküm yonga sayatenya mapa kecha meinyaktettsü saka asenok ajak longjemer asen alizüng atongtsü atema inyaktettsü ta ni tamang akar” ta Dr Shurhozelie-isa metetdaktsü.
Paisa, MLA tem dang parnok tsüngda mangatettep kar lira, katika dang tatok agütsütsüteptsü aser Naga loktiliba ajungtsü atema külemi inyaka aotsü ayongzüka liasü.
Taoba Chief Minister T.R Zeliang-i Dr Shurhozelie nem tenüngsang agüja jembidang, pa lenisüba aser lokti anitsü sempet ajanga state kanga ajangzüktsü, ta ashi.
Sorkar atsüngdoktsü merangba indang olen kar ashidang , T.R Zeliang-i ashiba agi, ita ishika tejaklen kija aser teloktemi tetsür nem shilem 33 lemzükja ULBs indang election agitsü mulunga liasü saka parnoki meyiper iba onük anema nokdak.
“Lokti mapa ka ama liasü saka yimtenren nung pei ajangzüktsü bilemer kari iba mapa ketdangsütsü tenzük aser ibaji ajanga nisung taküm sama aser kar yiru, sorkar kiojentem raksatsü aser mokdang ayongzükba ajanga tai maketba public tem timtem ajuru” ta paisa shisem.
“ULBs nung tetsür nem menden lemzüktsüba ajanga tetsürtem taginüba kümzüka yutsütsü atema onok alizüng liasü, saka mokdang ayongertemi ozü sorkar atsüngdoktsü meranga inyakdang tetsürtem dena shilem agiba atema sasar” ta T.R. Zeliang-isa metetdaktsü.
Paisa, Lok Sabha MP aser taoba Nagaland Chief Minister, Neiphiu Rio-i Naga loktiliba nung tensa süngjemdaktsütsü atema mapa inyakba atema pelaba metetdaktsü.
TR Zeliang-i Chief Minister menden toktsüba sülen pa Democratic Alliance of Nagaland (DAN) Co-ordination Committee nung Chairman asütsü shim.
Tanü DAN Legislature Party senden nung Dr Shurhozelie-i TR Zeliang DAN Legislature Party Chairman asütsü tenüng benok aser ibaji ajaki mulunga agizük.
Iba mapa ya Dr Shurhozelie-i inyaka liasü aser Cabinet Minister jenjang nung lir.
Dr. Shurhozelie Liezietsu indang temetettsü
Dr. Shurhozelie Liezietsu ya Naga People’s Front (NPF) President inyaker aser pa L. Khel, Kohima village nungi lir.
Nagaland Legislative Assembly (NLA) nung pa tiben tashi takok ngua MLA inyak aser mezüng election nung toktepbaji 1969 küm Northern Angami-I Assembly Constituency nungi liasü.
Pai election nung anaben tashi tamakok angu aser itemji 1989 küm NLA aser 1999 küm Lok Sabha nung liasü.
Dr. Shurhozelie-i Urban development minister inyak aser 2008 election nunga pai takok ngua tanaben atema Urban development Minister inyak aser iba mapang pai Higher and Technical Education mapa amsema inyak. Paisa Planning & Coordination, Cooperation, SCERT, School Education amala portfolio tem inyakogo.
2013 state elections nung pai metoktep aser cabinet jenjang nung Democratic Alliance of Nagaland Chairman ama inyaka arur.
Par jabaso Khriehu Liezietsu-i 2013 state elections nung takok angu aser pa Youth Resources & Sports, Music Task Force and State Lotteries indang parliamentary secretary inyak.
Dr. Shurhozelie ya Nagaland nung mezüngbuba regional party tenzükertem rongnung ka lir aser ibaji UDF nungi NNDP aser tang NPF party lir.
Pa ya Ura Academy nunga President lir aser kaket 40 dak tema züluogo.

Shurhozelie Liezietsu Bio Data
Born – November 20, 1936
Son of late Krusietsu, L. Khel Kohima Village
BA (Economics) honour from Guwhatii University
MA (Tenyidie) Ura Academy 1983
School Teacher in TM Government High Scholl mid sixties
1963-73 – secretary general (UFN/UDF/ NNDP)
1997-98 – President NPC
2005-2008 -President NPF
2008-2013 -President NPF
2013-2015 -President NPF
2015-2020 -President NPF
Authored 42 books
Life Member Bharat Scouts and Guides /president Ura Academy
Eight times legislator
1969 – United Front of Nagaland – Won
1974 -United Democratic Front -Won
1977 -United Democratic Front -Won
1982 -Nagaland National Democratic Party-Won
1987 -NNDP-Won
1989 -Nagaland People Council – Lost
1993 – NPC uncontested
2003 -Nagaland People Front- Won
2008 -NPF-Won