Tanü India aser China tsüngda mezüngbuba Dialogue alitsü

New Delhi, February 21 (Agencies) : India aser China tsüngda Jaish-E Mohammed kiralongrar Masood Azhar aser Nuclear Suppliers Group nung India züngsemtsü onüktem atema obang meputep adoka liaka tanü Foreign Secretary S Jaishankar-i Beijing nung China ketdangser Yang Jiechi den ajurutepa sensaksemogo.
Asüng India o China tsüngda mezüngbuba olemtep alitsü lia, tanü Jaishankar-i Jiechi sen ajurutepa senden ka amen.
Jaishankar-isa Chinese Foreign Minister Wang Yi den ajuruteptsü sentong lir.
Iba olemtep nung China-i Chinese Foreign Ministry nungi CPC Committee tanishisang adentsü mapa nungloktsüogo.
Ajisüaka, olemtep magidang China-i Jaish-e-Mohammed (JeM) tanishisang Azhar anema UN tenokdangba magizüktsü ta metetdaktsüogo. Iba onük asoshi kuli tejangja nüngdaker ta parnokisa shisem.
Yaküm India-i UN Security Council indang sanctions committee nung züngsemtsü atema application agütsüba nung China-i anaben tashi nokdanga liasü. Iba sülen taküm January ita France aser UK nati pusema US-i India züngoktsü atema telemtetba ka agi saka ibajia China-i nokdang.