Senchi magütsü nung VK Sasikala ita 13 talila tepoukdak ayutsü

Bengaluru, February 21 (Agencies) : Tim mesüi rongsen bendenba ken o nung aija tang AIADMK General Secretary VK Sasikala tepuokdak yua lir aser Supreme Court-i la dang sen crore 10 senchi achiba memenokra, la ita 13 talila tepuokdak ayutsü.
“Sasikala Natarajan-i sen crore 10 senchi agütsütsüla aser Supreme Court-i la dang achiba senchi magütsüra, lai ita 13 talila tepuokdak ayutsü” ta Prisons Superintendent, Krishna Kumar-i ashi.
Sasikala ya tang Bengaluru nung aliba Parapanna Agrahara prison nung yua lir.
February 14 nü Supreme Court-i Sasikala aitba ken o angadang aser la den külemi lar kinungertem küm pezü tepuokdak ayutsüba den külemi parnok nisung shia dang sen crore 1 senchi achitsü oshidang agütsü.
Küm pezü temerenshi agütsüba nungi Sasikala-i küm 3 ser ita 11 shi ka tepuokdak alitsü, kechiyong September 2014 nung trial court kati la aitsüba sülen la Parappana Agrahara jail nung anogo 21 puoka liasü.
“Iba ken o nung aitsürtemji VK Sasikala, Illavarasi aser Sudhakaran nungertem lir aser parnok ajak tangar den kasa dang ayur. Parnok shinga nema ‘special treatment’ magütsür” ta Kumar-isa osangbener dang ashi.
Security onük nung ajemdaker Sasikala aser Illavarasi na women’s block nung yua lir aser Sudhakaran ji men’s block nung lir, ta paisa shisem.
Parnok nem tepoukdak renemba chiyungtsütem dang agütsü aser doctor temi mapang shia parnok medical check asür aser mozütem agütsür. Parnok ajak common room ka nung television reprangdaktsür, ta Kumar-isa metetdaktsü.