IP Elections : Rahul, Akhilesh aser Shah nungertemi road shows agi

Allahabad, February 21 (Agencies) : Mongulbarbnü Congress lennir Rahul Gandhi aser Uttar Pradesh Chief Minister Akhilesh Yadav nati ayongzüka agiba roadshow nung nisung meyirjang aika aden aser külen BJP President Amit Shah-ia kasa yimti nung tashi sayua sentong ka agi.
Rahul Gandhi aser Akhilesh Yadav nati Bolsan roundabout nungi roadshow tenzük aser idakji tenati Mahatma Gandhi kürakyanglu ka nung naro enokja tetushi agütsü aser iba sülen nisung telok den yimdong sema senzü.
Iba sentong nung Congress aser Samajwadi Party züngsemtemi Akhilesh Yadav aser Rahul Gandhi na tenüng ayimtena anidak.
Tenati Anand Bhawan nungi Civil Lines aser idak nungjagi Golf Park tashi sentongji agi.
State BJP chief Keshav Prasad Maurya-i meiner BJP President Amit Shah-ia kasa yimti nung roadshow ka ayongzüka agi. BJP-ia kasa mapang nung sentongji agi saka lenmang balaka shim.
Amit Shah-i Chandra Shekhar Azad indang kürakyanglu nung naro enokja tetushi agütsü aser iba sülen Allapur police station nungi Ghantaghar tashi senzü.
Iba mapang BJP pusemertemi kilem nung noktaker lennirtem nem naro palokja liasü.
Uttar Pradesh nung Brihostibarnü assembly elections shilem pezübub agitsü aser iba mapang Allahabad nungi assembly menden 12 nung tokteptsü.