Philippine Senator-i Duterte dang ‘serial killer’ ajar

Manila, February 21 (Agencies) : Mongulbarnü Philippine Senator Leila de Lima-i linük tir Rodrigo Duterte dang “serial killer” ta aja aser Cabinet dang Duterte-i linük anitsü metemsü ta sangdongang ta mepishi.
Duterte-i pa Davao nung Mayor asüba mapang nisung tepsettsü nübu shima ayu aser taa agütsür nisung tepsetdaktsü ta tesüiba mapang police ketdangser Arturo Lascanas-i ashiba sülen Leila de Lima-i item o ya jembia liasü.
Leila-i Duterte-i aniba sorkar aitsüdang, Cabinet-i nisung tepseter Tir ka ket nungi linük kümzüka ayutsüla, ta ashi. Lai, Duterte ji linük nung yimsü asütsü metemsü, ta ashi
Leila-i, Duterte ji lokti anema inyaker aser “serial killer” nisung ka ta Lascanas-i kuli agütsüba ajanga jangjar. Anungji nüburtemia pa anema ola adoktsüla, ta ayongzük.
Davao death squad temi nisung jenti tepsetba atema aser Tir-i temesepba mozü anema raraba mapang ozüng dak alia nisung 7,000 tashi tepseta intokba atema, lai Duterte kanga mejungi aitsü.
De Lima-isa, 1972 nungi 1981 tashi dictator Ferdinand Marcos-i martial law sangdongba sülen nisung tepsetba tanga Duterte-i timba tepsetogo, ta aitsü.
Linük nung nisung tepseter tulutibaji Duterte lir, ta lai ashi.