Malaysia:Kim tasümang par jabaso nem jangjadaktsütsü atar

Kuala Lumpur, February 21 (Agencies) : Malaysia ketdangsertemi taoba hopta Kuala Lumpur tayimtsü anenba tesem nung tangari tepsetsang, North Korea nunger Kim Jong-nam tasümangji shitakba Pyongyang lenir Kim Jong-un tedi aser pa tebu asü masü ibaji jangjadaktsütsü asoshi par jabaso atadar, ta osangbenertemi ashi.
Police Chief Abd Samah Mat-i Kim Han-sol Malayasia atong matongar osang tejangja magitep, ajisüaka tang tashi nung par asür kinunger shingaia pa tasümang bushia maru, ta TV osang ajanga metetdaktsü.
Mat-i, shiba iba tasümang bushia arudir pa Kuala Lumpur mozükidangi anir oa tasüsangji jangjadaktsütsü aser DNA agia shitakba par zü ta kuli anguba sülenang North Korea Embassy nem osang agütsütsü, ta ashi.
Malaysia ketdangsertemi ashiba agi pa tasüngmang sensaa reprangba osang Bodhbarnü metetdaktsütsü.
North Korea Ambassador Kang Chol-i, Malayasia nunger dak temulung malemba agi ni senteper bushisüngdangtssü shiogo, ta ashiba osang ajanga metetdaktsü.
North Korea ketdangsertemi temelaba magütsü sürnung Malaysia nungeri pa mang sensaa reprangba atema Kang Chol-i Malaysia aitsüogo.
Malaysia Ato Kilonser Najib Razak-i, iba aitsüba angashia Malaysia police aser forensic mongintem pusema ashi.
February 13, 2017 nü Kim Jong-nam ya foreign minister ka ama Kim Chol tenüng nung passport ka yanglua bener Kuala Lumpur tayimtsü anenba tesem nung tayimtsü ata aliba mapang tetsür anati arua rejak nung miim mozü shiloktsü.
Iba dak sendakba nung Indonesia aser Vietnam tetsür kaka pua lir. Tenati ashiba agi, memetetba nisung kati tena dang Kim dak iba mapa inyaktsü ashi.
Kim Jong-nam ya May 10, 1971 nü Pyongyang nung aso aser pa ya asür North Korea dictator Kim Jong-il aser pa kinungtsü actress Song Hye-rim na jabaso lir.