Tanur Asthma keter alirtem tango sashiba reprangshitsü asoshi Smartphone ajungkettsü

February 21, 2017 (Agencies): Chinese health alliance-i tanur asthma agi kangshia alirtem tangola sashiba reprangshima alitsü asoshi kaket aser smartphone apps tem nung ‘peak flow charts’ tem ajungkettsü asoshi molunga agizükogo.
Chinese health alliance den State Clinical Research Centre for Respiratory Diseases, Beijing Children’s Hospital, Chinese Pediatric Society under Chinese Medical Association densemogo.
State Clinical Research Centre for Respiratory Diseases nung tekolakba Professor Shen Kunling-i ashiba agi, tanurtem asthma agi kangshiba nokdangtsü asoshi, tsüraburtemi iba tashidak nung sendakba teinyaktsütem jangja meteta aliba, mozü achitsü asoshi tetuyuba shidak anidakba aser mapangshia reprangshia alitsüla.
Asthma ya tanurtem tangola sashiba nung timtem adokba tashidak rongnung kanga bolua adokba tashidak ka lir. China nung tanur million 6 dang nungi tema dak iba tashidak lir. Iba tashidak agi shiranger parnok shilem 30 agibo mapang shidak nung anepalu maser, aser iba ajanga ana nung asembo asthma attack asüba osang lir.