Assam nung lenmang aser metsümeshidak yanglutsü asoshi school tanurtemi sen aser nübu tenla

Guwahati, February 21 (Agencies): Assam, Sontipur district nung aliba school tajung ka nung tanurtemi sen bendena, lenmang aser tetsürtem metsümeshidak tesem yanglu.
Guwahati nungi kilometre 200 shi orr Balipara tesem nung aliba Assam Valley School (AVS) nung azünger kaketshir 850-i Khelmati shishilemba dak tesem anasa aliba lenmang metre 90 aser tajemzük tia nung aliba kibongtem nungi arua azünger tetsürtem asoshi metsü meshidak tesem yanglutsütsü asoshi sen lakh 3.5 taoba hopta benden.
Meyi mapang Assam nung ita trok tashi mesüra tali, tsünglu alur aser iba ajanga yimtsüng lenmang kanga mejungi akümer.
AVS indang Social Service League nung ‘middle-level’ aser ‘senior-level’ nungi kaketshir 60 lir, aser parnoki lenmang yanglutsü asoshi sen lakh 2 lemzüktsü. Mezüngbo iba lenmang yangludang parnoki tangar nem inyakdaktsü saka parnok sasa inyaktsü renem.
Higher secondary nung azünger tanur pezü- Sukanya Hazarika, Rohit Agarwal, Ayushi Jain aser Shreyansh Agarwal nungertemi iba sentong ya tenzük, ta iba school ketdangsürtemi ashi.
“Tanurtem parnok taküm asoshi terenemshiba agütsütsü asoshi iba school ajanga tesayuba agütsür, shisa agütsüba dang nungi pei sasa inyaka chiyonga alitsü tongtibangba aser subject sayuba dang nungi tanur sayuba tongtibangba lir,” ta AVS indang principal, Sonya Ghandy Mehta-i ashi.
Assam Valley School ya Williamson Magor Education Trust-i 1995 küm lapok aser iba school ya ali acre 95 nung lir. North East nung ‘co-educational boarding school’ ji AVS ya kisüng lir.