IOS-i pro boxing atema ano tsüngteper 13 sign südaktsüogo

New Delhi, February 21 (Agencies) : Beijing Olympics nung tsüngteper tajung Vijender Singh, Akhil Kumar aser Jitender Kumar nunger sülen ano tanü Mongulbarnü IOS Boxing Promotions-i tsüngteper 13 pro tsüngteper akümtsü sign südaktsüogo.
Tanü New Delhi nung sign asürtem rongnung Olympic nung tsüngteper Diwakar Prasad, Commonwealth Games nung medal ngua tsüngteper Amandeep Singh, WBC Asia welterweight champion Neeraj Goyat aser MMA champion Pawan Mann nunger densema lir.
Parnok sign asüba sülen tang India nungi pro tsüngteper parnok nisung 16 kümogo aser parnok training ji Gurugram nung aliba IOS boxing training tesem nung bendanglen nungi anir aruba trainer tem den agitsü.
Arishi küm 32 tain, Diwakar Prasad-i pa pro-boxing mezüngbubaji IOS nung tsüngteptsü. Pa ya 2004 küm bantamweight telemsa nungi Athens, Greece Olympics nung tsüngteptsü shima liasü.
Diwakar international asayamung aika nung India atema tenüng tajung bener arutsüogo. Pai 2003 küm Commonwealth Boxing Championship aser Asian Olympic Qualifiers naprong nung bronze medal angu. Ano Asian Games Qualifiers 2004 nungbo silver, SAFF Games 2004 nung bronze aser Grand Prix Boxing 2006 nunga Silver medal temsa ngua lir.
Jharkhand nunger Diwakar-i, “Ibai ni asoshi mera tuluka lir aser ni tsüngteper mongin ka kanga kümnüa liasü. Ni international nung India nema atangtsüsa kanga meranga inyaktsü,” ta ashi.
Arishi küm 29 tain, Amandeep ya yaküm pro tsüngteper aküm aser pai iba sülen anaben tsüngtepba nung takok ngua lir. Pai Commonwealth Games 2010 nung bronze ngua liasü.
Arishi küm 26 tain, Haryana nunger Neeraj 2011 küm China nunger Gou Wen Dong den pro ka ama mezüng tsüngtep. Pai 12 ben tsüngtepdang round 71 ben tsüngtepogo aser pai item tsüngtepba nung takok 8 ben ngua lir. Takok 8 rongnung anabo knockout agi akok.
Pai International Boxing Association (AIBA) Olympic qualifier nung bronze medal ngua lir.
Arishi küm 29 tain, Pawan ya Mixed Martial Arts (MMA) asayar ka lir aser pai welterweight aser lightweight telemsa nungi Super Fight League (SFL) nung pro asaya punguben asayaogo. Asaya anaprong nung pa champion angu.
IOS Sports & Entertainment nung MD aser CEO, Tomar-i, “Onok ajaki linük nung pro boxing ajungkettsü asoshi meranga inyaktsü aser tang nisung tasentemi sign asübaji mera tetenzüker asütsü. Gurugram nung onoki international trainer tem anir arua World class training agütsütsü,” ta ashi.