Manipur Deputy CM Gaikhangam taküm agitsü merang UNC den olemteptsü renema lir : Okram Ibobi Singh

Imphal, February 21 (Agencies) : Mongulbarnü telungpurtemi Manipur Deputy Chief Minister Gaikhangam taküm agitsü merang saka pa lendong nungi jenbuogo.
Tamenglong district kübok Namkalong nung tanep 10.30 ako meta Gaikhangam election atema nüboyimba sentong ka nung adentsü aodang lendongji atalok.
Telungpurtem jagi tesem ana tashi nung Gaikhangam indang cavalcade nung injang kahlokja amak aser iba mapang police commando ka yiru, ta police-i metetdaktsü.
Iba tatalokba sülen Gaikhangam len tom nung minute ishika anenzüktsüsa aküm, ajisüaka parnok sentong agiba Khoupum tesemi ao aser idakji sentong nung aden, ta police-isa ashi.
Tanü Manipur Chief Minister Okram Ibobi Singh-i osangbener den jembidang, ita asem tashi rongsenren mokdangba agientsü atema United Naga Council (UNC) den olemteptsü renema lir ta ashi.
BJP-i UNC den telung nung angatetteper mokdang nung yariteper saka March elections nung BJP indang tasaji tamakok angutsü, ta Ibobi-isa ashi.
State sorkari UNC den olemtep alitsü atema renema alitsü asü koda ta osangbenertemi asüngdangdang, “hau, onok renema lir” ta pai langzü.
Kechiba district tasentem tentettsü atema mezüng UNC den mejembitep ta osangbenertemisa asüngdangdang, “Onoki olemteptsü merang saka parnoki manga. Onok külemi mener iba onük jembitsüba liasü saka onoki parnok jaokaka, parnok maru” ta Manipur Chief Minister-isa langzü.
Manipur nung Congress sorkari parnok tamakok nembangtsü atema tasa atonga mokdang lidaktsü ta Home Minister Rajnath Singh-i aitsübaji tiyazü ta Ibobi-isa ashi.
State sorkari central forces mamshi ta Rajnath-i aitsüba atema Ibobi-i ashiba agi, “Nenoki tesem jagi odangra NSCN (IM)-i amokmerenba tetsürtem aliba angutsü. Mokdang agientsü atema onoki injang mashi mekahdoktettsü. Centre-ia teinyaktsü kar lir” ta paisa metetdaktsü.
“Centre-i iba tensa atalokdaktsünüa liasü. Langka kar meshitak kümra aser nisung kar taküm samara, Centre aser BJP-i onok dak tai tongloktsütsü. Parnoki Manipur nung law & order mejungi kümogo ta onok aitsütsü aser iba nungi parnok ajangzüktsü merangtsü” ta Ibobi-isa shisem.
“Tawa tu Union minister Prakash Javedekar-i chief minister-i menden toktsüra aser President’s Rule benokra, anogo ana tsüngda UNC mokdang anendaktsütsü ta shiogo. Iba ajanga UNC aser BJP na tesentaktep lia mapa inyakba kuli sayur” ta paisa aitsü.
Taruba elections nunga Congress-i takok tulu angutsü aser BJP indang tasa tamakok ngudaktsütsü, ta Ibobi-isa ashi.