Imkong L Imchen NPF nung anioker

Dimapur, Feb.21 (TYO) : Nagaland nung taoba home minister aser tang MLA Wb.Imkong L Imchen NPF telok nungi adok saka parnok telok nung mangatettep adoka 2016 küm April 14 nü NPF telok nungi pa suspend sütsür aliba telemtetba ka tanü Mongolbar nü NPF tir Dr.Shurhozelie-i agienogo.
NPF lokti senden alidang NPF purtem rongnung mangatettepi aliba angatetteper putepa aotsü lemteta aliba ama, Imkong L Imcheni NPF telok anema inyakba mapatem asoshi February 21, 2017 nü taidok meshi nungji, Naga nunger aser talisa NPF purtem tali longjema tangatettep nung aotsü asoshi pa NPF nungi suspend süja alibaji tanü 21:02:2017 anogo nung agientsür ta NPF tirisa metetdaktsü.
Bodbar nü Dr.Shurhozelie chief minister ser aniba government akümtsü anendaka lir aser iba government nungji Imkong L Imchen cabinet menden angutsü renemogo ta angazüker.
Ano, talisa pa NPF nung tanaben aniokbaji Mokokchung nung NPF telok tashi itshia aotsü nükjidong nung aniok ta angazüker.