JCC & NTAC-i govt. nem mapang ita ka agütsü

Dimapur, February 21 (TYO) : T.R.Zeliang-i chief minister menden toktsüba sülen ano anünga akaba mapatem inyaka aotsü asoshi telemtetba agitsü atema Mongolbar nü Dimapur nung Joint Coordination Committee (JCC) aser Naga Tribes Action Committee (NTAC) na senden ka menogo.
Iba senden nung adenertemi Nagaland nung nübortemi aginüba ama ULB election magi thitemba aser T.R.Zeliang chief minister menden nungi anenbaji tongtibang takangba ana atalokba asütsü, ajisüaka taoba Dimapur Police Commissioner aser January 31 aonung nisung dak akhar policetem mapa nungi manentsüba asoshi mepelaba metetdaktsü.
Tanü JCC aser NTAC senden ghonda asem shi amenba sülen osangbenertem den jembidang ashiba agi, parnoki akangba ama taoba Dimapur Police Commissioner aser January 31 aonung Dimapur nung nisung dak akhar policetem mapa nungi anentsüla aser ano Longleng DC, shibai longkak aiter nübortem dak akhatsü mela, pajia dena mapa nungi anentsütsüla.
January 31 aonung Dimapur nung policetemi nisung dak akhaba lendong indang bushisüngdangtsü asoshi government-i nisung kati akümba Judicial Inquiry Commission ka shima lir saka ibaji magizüker ta JCC aser NTAC nati metetdaktsüogo.
Iba Inquiry Commission-ji nisung asem agi akümba asütsüla aser nisung asem rongnungji kabo lokti tentet (civil society) nungi asütsüla aser parnoki bushisüngdangba osangji ita ka nung agütsütsüla ta JCC aser NTAC nati takangba ka agütsüogo.
Lendong atalokba maparen nung shilem agirtem Joint Inquiry Commission nungji denra, kodaser tatalokba shitak bushitettsü ta metetnüa asüngdang dang, kecha tsütsüa maden aser shilem magiba nisung temulung lemtettsür pur karbo lir, anungji itemji shimoktsüla ta JCC lenirtemisa metetdaktsü.
Parnokisa Nagaland Municipal Act reprangshia melenshitsüla ta nenshia metetdaktsüogo.
Ano, tarutsü anogotem nung inyaka aotsü asoshi jembitsü atema Naga kin hoho shia lenirtem den taruba ita March 3, 2017 nü 11:00 Am nung Dimapur nung senden ka alitsü lemtetogo.