Taoba sorkari aibelenba tanaben melepshitsüla : ACAUT

Dimapur, Feb. 22 (TYO): Arrla 371 kongshitsü, ta tribal tentettemi ola adokba sorkari sendoka yutsüba ajangaji, MLA kati danga nüburtem ola mangatsü, kechiyong parnoki votes ji sen agi alizük ta sayur, ta tanü ACAUT Nagaland Media Cell-i sangdong ka ajanga metetdaktsü.
“Tang Chief Minister tasenba, Shurhozelie Liezietsu kübok akumba sorkar tasenba dang, taoba sorkari tekong meranga nüburtem tim temeten magutsüba, talisa itasen magutsüba, mid-day meal schemes shitak meinyakba mesüra PDS jang, SK totzü, shini ama tim magütsübatem joko melepshitsüla,” ta ACAUT-i metetdaktsü.
“Taoba sorkari, parnok ket nung sen mali ta yazü jembiba ama Chief Minister tasenbai melepshitsüla,” ta sangdong nungsa shia lir.
“RTI documents ajanga ashiba agi, 2015-16-17 küm atema Centre nungi state dangi yokba sen, December 7, 2016 nung state senpong nung sen crore 5229.56 liasü. Iba senji SSA, RMSA aser Hindi tesayurtem ajak senteper 100 bena agütsütettsüsa lir. Ajisüaka TR Zeliang sorkari tesayurtem mezüngmeshia tzü kahloktsü aser meshimetsü tia-i yok. Tai maket tesayur noklang aika sen aputsür matsüngdang sentsüh lir, aser sen tetemlok maoteter, ibaji temelung shirangtsüka lir,” ta ACAUT-i ashi.
“Tai maket kibongtem taküm raksatsüba atema ACAUT-i taoba TR Zeliang sorkar aitsür,” ta parnokisa ashi.
“Taoba TR Zeliang sorkari Naga nunger dang state sentsüh nung lir ta yazü ashi, ajisüaka 14th Finance Commission-i saru nungi state nem sen crore 5216 agütsü ta jangjaogo. Anungji TR Zeliang sorkari item senji tesayurtem itasen densema tim tamshitsü nung amshitsü liasü,” ta ACAUT sangdong nungsa shia lir.
“CM tasenba, Dr. Shurhozelie Liezietsu-i atangji nung par nüburtem timtem junga angateta lira pa dang, totzü meyoktepba aser jang ochimashi ken o atema dang masü saka state senpong nung sen crore 5229 ji tang tashi ali asü mali’ar bushisüngdangtsü atema CBI anir arutsü mepishir,” ta ACAUT-isa ashi.
“Pa dangsa ACAUT-i mesangdongdang HPC Report sangdongtsü mepishir. Ano sorkar mapa inyakertem aser contractor tem danga, bill magütsüi aliba aser itasen magütsüi aliba sen agütsütsü asoshi sen peria lir ta metetdaktsür. Itasen aser bill magutsütsü atema yazü kuli kar danga yanglura ibajibo 2018 küm election atema sen agitsü asoshi yazü jembir asütsü,” ta ACAUT Nagaland Media Cell ajangasa metetdaktsü.