State Angh-i ENPO dang lungkak maittsü mepishi

Kohima, August 13 (TYO): Tanü sandong ka ajanga Nagaland Angh, P B Acharya-i, Eastern Naga Students’ Federation (ENPO)-i Nagaland sorkar ‘job reservation policy’ atema akhangbatemji süoki ia bilemtsür aser item takhangbatem reprangshimtsü atema ni state sorkar dang mepishia liasü, ta metetdaktsü.
August 11, 2015 nü State Cabinet senden amenba mapang ENSF takhangbatem asoshi mera aika agitsü atema telemtetba agiba osang ni angazükogo, ta paisa ashi.
State sorkari ENPO tesem nung backward tribe trok nungi police force nung shimokogo, ta pai ashi.
State sorkari commission ka ama state nung backward tribe tem dak sentakba data bendentsü, reprangshitsü aser terenlok mapatem, shisaliok aser mapa, anema-alibaren nung tetuyuba agütsütsü asoshi mulungogo, talisa Backward tribe tem asoshi mapa wazüka yutsüba onük dak sentakba nung department balala, Service Rules nung sorkari telatetba inoksemtsü lemtetogo, ta Angh-isa ashi.
“Nenok takhangbatem atema sorkari nüngdakba meratem agir asünungji, aser state nung 69buba Independence Day benjungmong sentong lir asünungji Eastern Naga Students Federation-i lungkak ayongzükbaji thinener state nung Independence Day sentong tesünep nung mongdaktsüra pelatsü, ta Angh-isa shisem.