LWWS purtemi diabetes tendanga anepalu

Dimapur, Feb. 23 (TYO) : Dimapur nungi Longjaknep Women Welfare Society purtemi medical doctor-tem anir oagi Akhoya aser Unger yimtak diabetes tendangba sentong ka ayongzüka agiogo. Iba sentong nung nisungtem aruagi tendangertem rongnung noklang nung shilem 60 dakbo diabetes aliba puteta mozü angati agüja liasü.
Iba sentong nung ya LWWS nung mendenbula Wt.Amenlai anir society nung züngsemtem den Dr. Imtijungshi Aier (SMO, CHC) Changtongya, Dr.Sandip Agarwal (MBBS, MD, DM) Endocrinologist, Guwahati, Mr. Prasenjit Singh, Demonstrator, GMCH, Mr.Prasenjit Sarma, Technician, Microgene Diagnostic System Pvt.Ltd nungertemi manemertem anepalua liasü.
Iba sentong nung adener yimtaklirtem dang, temang anema alitsü asoshi mozü kija dak nendaka melii alu nung mozü mamshii züsentetba chiyongtsütem achitsü aser exercise agitsübaji tongtibang asütsü ta Dr.Sandip Agarwali-i metetdaktsü. Paisa yimtaklirtem dang ita asem shia khen temang tendangtsü nüngdakba indang shia liasü.