Assam aser Arunachal Pradesh nung telungpurtem apu

Guwahati/Imphal, February 23 (Agencies): Brehostibarnü Assam aser Arunachal Pradesh nung mitkartemi NSCN (K) telungpur ka aser Kamatapur Liberation Organisation (KLO) telungpur asem apu.
Osang ajanga ashiba agi, NSCN (K) telungpur ka ya Arunachal Pradesh nung Wakka tesem nung mitkartemi apu.
“NSCN (K) telungpur ya Wakka yimtsüng nung aliba nüburtem merenshia sen meshiba osang angazükba sülen, DAO division kübok Khonsa Battalion-i mita bushiba mapang apu,” ta Kohima nung amenoka aliba Defence PRO, Colonel Chiranjeet Konwer-i ashi.
Pa tenüng ya Pansai Pansa, ta jangjaogo aser pa ket nungi pistol ka den injang ngutet.
Assam nung aliba Kokrajhar district nunga mitkartemi Kamatapur Liberation Organisation (KLO) telungpur asem apu.
Itangiteri osang sangoktsüba sülen police aser mitkartemi Fakiragram anasa aliba Devdevi yimtsüng nung mita bushiba mapang KLO telungpur Hujendra Barman, Bijoy Baruah aser Hiteswari Baruah nunger apu.
Parnok ket nungi 12 bore rifle ka aser injang ngutet.
Manipur nung tetsür ka den, telungpur ka kahset
Mongolbarnü Manipur nung mitkartem aser telungpur tsüngda kahtepba mapang tribal tsür ka aser telungpur ka kahset aser telungpur ka yiru, ta police ajanga ashi.
Iba tesem nung mitkartemi mita-bushiba mapang, yirur alisang telungpur ya apu.
Osang ajanga ashiba agi, Gorkha Rifle mitkartemi Noney district kübok Khoupum tesem nung mita bushiba mapang telungpurtemi parnok dak injang akah tenzük.
Mitkartem aser telungpur tsüngda minute 10 shi kahtep aser iba mapang tetsürla den telungpur sangji kahset.
Tetsürla ya Adingu Rongmei liasü ta jangjaogo, ta police ajanga ashi.