Parliament senden tembangogo

New Delhi, August 13 (Agencies): Tan mongpu Parliament senden tenzüknü, July 21 nungi opposition party temi takhangba balala agüja lungkak aitba ajanga senden nung mepetmesü adoka anogo 24 tashi senden junga magiteti tanü Brihostibar nü tembangogo.
Lok Sabha aser Rajya Sabha naprongla nung senden tepiyong Congress-i anir opposition party temi Lalit Modi aser Vyapam ochimashi ken o nung densema aliba BJP lenirtem- External Affairs Minister Sushma Swaraj, Rajasthan chief minister Vasundhara Raje aser MP chief minister Shivraj Singh Chouhan nunger menden nungi aludaktsütsü asoshi takhangba agüja senden nung mepetmesü liasü.
Lok Sabha Speaker, Sumitra Mahajan-i Congress MP 25 pongunü atema anentsüba ajanga opposition party aika Congress den ka küma lungjemer parnok tejashi sayua Lok Sabha senden nung anogo pongunü prongla maden.
Rajya Sabha senden khen-a junga magitet saka Lok Sabha nungbo rongrong aiben adokaka yashibo Lalit Modi ken o benoka jembiogo.
Rajya Sabha senden ghonda 9 dang agitet aser ghonda 82 bo rongrong adoka amajok nung süidaktsü aser Lok Sabha nunga rongrong adokba ajanga ghonda 34 amajok nung süidaktsüogo.
Senden junga magitetba atema Mahajan-i tesasaba olen ka jembiba den külemi, “Taruba senden nungbo asenoki tajungtiba nung katettsü ni imlar,” ta ashi.
Tan mongpu nung takoksa tulutibaji, linük rongsenkettsüng jenjang tajungba akümtsü nükjidong nung sorkari benokba Bill, Goods and Services Tax (GST) magizüktetba ya asütsü.