Kerala nung actress apusang puogo

Kochi (Kerala), February 23 (Agencies): Malayalam actress ka puer aoba ken o nung tongti aibelener, Pulsar Sunil anogo trok nü lir Brihostibarnü puogo, ta tanü state police osang ka ajanga metetdaktsü.
Brihostibarnü Kochi nung osangbenertem den jembidang Kerala Police nung tongti, Loknath Behra-i, Pulsar Sunil aser pa den yariteper ka puogo, ajisüaka asüngdangyadang tenati osang tejangja mashir, ta metetdaktsü.
Malayalam actress laji February 17, 2017 nü la gari nung Thrissur nungi Kochi-i meyipa arudang tebur telok kati la apu, aser tesülen laji director nungi actor akumsang, Lal’er ki anasa anizüka toktsü. Iba tatalokba sülen tamalen la gari anisang Martin apu.
Actress la jagi police dang ashiba agi, Pulsar Sunil-i laji tangar tetuyuba agutsüba nung ajemdaker apu ta la dang ashi.
Sunil ya film industry nung aika den metettepa lir aser pai actress la dangji, la aputsü atema kari pa nem sen agutsü, aser lai nungnangra pai tashiyim amshitsü ta amokmerena liasü.