C-section agiba sangdongtsü Maneka-i benoker

New Delhi, February 23 (Agencies): India nung aliba hospital tem, talisa nija hospital tem nung caesarean section surgery agiba kanga bulur, aser online ajanga nisung lakh 1.3 dak temai sorkar dang iba anema inyaktsü mepishiba sülen sorkari mera agiogo.
Iba temepishiba sülen Women & Child development Union Minister, Maneka Gandhi-i shidi ka ajanga Union health minister, J P Nadda dang, hospital ketdangsertemi peipei hospital nung c-section surgery kwi agi aser normal delivery kwi liasü ibaji nüburtem dang sangdongtsü atema inyakdaktsüner, ta mepishiogo.
Bodhbarnü Maneka-i twitter ajanga, “Tanüasüng hospital tem nung c-section surgery kanga buluba atema ni tebilemtsü akar. Iba onük ajanga ni kanga tebilemtsü akar, kechiyong iba ya tetsürtem anema-alibaren den sendaktepa lir. Iba ya talisa nija hospital tem nung kanga bulua inyakteper. Iba ya tebilemtsü tulu ka lir,” ta metetdaktsü.
“Kuli makai sen ajangzüktsü atema dang C-section agitsür gynaecologist tem onoki maksüja tenüng sangdongner. Ni India nung aliba tetsürtem ajak longjemer iba anema nokdakdaktsüner, kechiyong Caesarean atema tetsür ka temang rangsar, aser tim lenmang agi tanur sotettsüsa süaka menüngdakba nung operation agitsür,” ta Maneka-i osangbenertem dang metetdaktsü.
State aser UT 15 nung agiba National Family Health Survey 2015-16 ajanga ashiba agi, state kar nungbo c-section surgery agiba shilemji 87.1% tashi lir, ajisüaka World Health Organisation (WHO)-i latetja aliba agi, linük ka nung tanur sotsüba shilem 100 nungi c-section ajanga tanur rangtetba shilemji 10-15% dang asütsüla.
Mumbai nung amenoker aliba Change.org ajanga temepishiba nungji, linük nung hospital tem aser doctor temi tetsürtem surgical delivery sütsüba anema inyaktsü shia lir.
International Institute for Population Sciences nung research agir shisashir, Chayan Roy Choudhury-i agiba study ka ajanga ashiba agi, India nung küm shia c-section agiba shilem 16.7 ainer.