Assam Rifles-i Independence day jakdang NSCN (K) sentong raksatsü

August 13 (TYO): Linük nüjiso ngur küm 69buba ajungba mung atongtsü anasa NSCN (Khaplang)-i Nagaland state nung Security Force tem anema mapa tamajung inyaktsü aser tesem-tesem nung bomb pokdakja sepaitem dang masü saka state nüburtem dena timtemdaktsütsü tasa asaba osang agency aikati lazükogo, ta Assam Rifles (AR) sangdong ka ajanga metetdaktsü.
NSCN (K)-i tasa tamajung asaba nungi kümzüktsü aser parnoki bilemba ama lendong matalokdaktsütsü asoshi Security Force tem kanga akhangshiogo, ta kasa sandong ajanga ashi.
Longsa yimtak NSCN (K) züngsem kar lir ta osang tejangja lazükba sülen AR tem yimtsüng jagi ao. Aug. 13, 2015 anepdang yakta NSCN (K) teloki AR tem dak injang kah meso anungji AR temi meyiba injang akahtsü tenzüka kanga sashia kahtepdang NSCN(K) nungi ana kahset, ta parnokisa ashi.
Kasa sangdong ajanga ashiba agi, iba operation nung AR temi raradang amshiba oset aika- AK rifle, pistol aser China nung yangluba grenade aika nguteta lir. Ashiba agi item raradang amshiba oset ya Mokokchung – Tuensang Highway aser anasa aliba jilatem nung kiralongra mapa inyaktsü asoshi NSCN(K) nung tanishirtemi tetuyuba agütsür liasü.
AR temi iba operation takok ngua agitetba ajanga NSCN (K)-i India nüjiso anguba anogomung nung lendong agütsütsü sentong yanglua aliba aika raksatsüogo aser iba ya ajanga yimjung meimertem dak nungi tetsübu shisatsü samatsü aser tali tasü aittsü, ta AR sangdong ajangasa metetdaktsü.