Naga nunger timtemshia timtemogo: Khole

Dimapur, Aug.13 (TYO) : Naga nunger rongnung temulung melemtep, melongjem, mangatettep aser tamajung bilema inyakba mapatem ajanga Naga nunger timtemshia timtemogo aser iba jagi Naga nunger rongnung tesempatep aser tetsübu shisatsü enoktsüogo, ta tanü Brehostibar nü Naga nunger nüjiso sangdongba anogomong 69 buba amongtsü anogo ka jelia GPRN/ NSCN tir Wb.Gen (Rtd) Khole Konyaki metetdaktsü.
Tanübo asenoki meshitak inyakbatem ajak amadoker, kati ka aitsüteper, ajisüaka tanü asenok meketa atalokba ya asenok tai ajanga ataloker, iba jagi asenok tsüngda tangari asenok anema sademsadema inyaktetter ta paisa metetdaktsü.
Naga nungertem ya tsükchiteptsüba atema masü mesüra asenok sobaliba balala masü saka asenok rongnung meputep adoka pei ajunga asaba shisatsü dener asenok rongnung tuluba toktepdang asenok kanga akoksaogo aser tang ya mapang tamajung ka ajurudagi ta paisa ashi.
Naga nunger yimten nüjiso atema rarabaji Nagaland tuluba mesüra tilaba atema masü mesüra alushi longjemtsüba mesüra melongjemtsüba atema masü saka asenok yimten temeten agizükdaktsütsü asoshi lir aser ibaji India sorkari tebang agibo hau ta nangzüka lir, ajisüaka tang tashi melatetteti lir, ta GPRN/NSCN terisa ashi.
Ibai Naga nunger ajak atema tai nangzüktsüba mapang ka lir, asenok ajak longjemer tarutsü Nagaland yanglutsü asoshi bendanga agütsüshidi ta paisa ashi. Joko, asenok ajaki tesüiba toktsüdi aser lanurtem mangdang atalokdakja tarutsü asoshi bilema inyakdi ta paisa ayongzük.
“India sorkar o NSCN-IM na tsüngda tangatettep ka nung sign süogo ta angashia pelar saka parnoki Nagaland nung aliba Naga nungertemi parnok tarutsü asoshi yangluba mapatem angatettsüla,” ta Kholeisa ashi.
“Kodanga nübortem den masüngdangtep aser temelaba magii Naga yimten tebilemtsü ken o tatem küma melatettsü,” ta paisa metetdaktsü.
Paisa Naga yimten nüjiso asoshi pei taküm tenlaa agüja inyaker mezüngpurtem bilemteta akhüm agüja liasü.