BJP ya tangar reprangzüktsü mongin lir: Akhilesh

Lucknow, February 25 (Agencies): Ato kilonser, Narendra Modi-i, Uttar Pradesh Chief Minister, Akhilesh Yadav’er sorkari state nung mafia reprangzüka inyaktsü meranger, ta aitsüba sülen iba oji meyipja Honibar nü Akhilesh-i, BJP ya tangar reprangzüka inyaktsü mongin lir, ta aitsü.
Honibarnü Uttar Pradesh, Siddharthanagar district nung assembly election nüboyim sentong ka nung jembidang Chief minister Akhilesh-i, BJP-i Samajwadi Party manifesto reprangzüker, iba nungji kaketshirtem dang angati laptops agutsütsü nangzükba densema lir, ta ashi.
Akhilesh-isa, Narendra Modi-i tangari asemba süoshi reprangzüka asemer, ta aitsü.
“Ato kilonser, nai kü dang tatidang nung tangar reprangzüka züluba indang ashir. Süra shibai tanga reprangzüka sen lakh aika jenjang süoshi asemer?” ta asüngdang.
“Nisung kati (Modi) suit nung pa tenüng zülur asem. Iba nisungbaji shiba? ta ni BJP dang asüngdangner,” ta paisa ashi.
Arishi küm 43 SP lenir, Akhilesh-i, “Onoki laptops, smartphones aser terenlok atema jembir, aser BJP-i leper aser tasümang arongba tesem yanglutsütsü indang jembir,” ta metetdaktsü.
Taoba Deobarnü election nüboyim sentong ka nung jembidang Modi-i, “Yimtsüng ka nung leper yanglutsü atema senotsü ngura, tasümang arongba tesem yanglutsü atema-a senotsü angutsüla. Eid benjung nung power supply methitmi agutsüra Holi benjung nunga kasaji agütsütsüla,” ta jembia liasü.
Akhilesh Yadav-i, SP ya lanurtem, aluyimertem aser sensakertem atema party ka lir, ta ashi.
Bahujan Samaj Party (BSP) tongti lenir, Mayawati aija pai, la nüboyim sentong nung lai onük tanglanglang jembiba ajanga nisungtem amozüka aoer, ta aitsü.
BSP-i Bharatiya Janata Party (BJP) den miima tezüngzüktep ka yangluogo, ta Chief Minister-isa aitsü.
Taoba mapang Mayawati state chief minister inyakdang lai aniba sorkari park aika yanglu aser BSP lenirtem indang kürakyanglu aika yanglua liasü, aser iba dak sentakba nung Akhilesh Yadav-i, parks aser kürakyanglutem yangluba nung ang mazüngi aliba sorkar ka nüburtemi maginer, ta ashi.