Pakistan-i Afghanistan nunger 252 meyipa yok

Islamabad, February 25 (Agencies) : Tang Pakistan-i Afghanistan nunger maitdaktsütsü asoshi arrtsülen gate shibanga liakasa, linük ana tsüngda tesendaktep meraksatsü mechi nung Pakistan-i Afghanistan nunger nisung 252 par linüki meyipa yokogo.
Linük nung maneni tapoktsü lendong atalokba ajanga Pakistan-i Afghanistan tena arrtsülen gate shibanger tanü agi anogo 9 buba lir.
Afghanistan nungertem ya Hokolbarnü meyipa yok. Torkham arrtsülen shibanga aliba ajanga parnok ya hopta ka shi moapu nung liasü, ta osangbenertemi ashi.
Linük tesem aika nung tapoktsü lendong balala atalokba agi security tebilemtsü adoka Pakistan-i Afghanistan den Torkham aser Chaman tesemtem shibangba ajanga Islamabad aser Kabul na tsüngda shishilemba mapa kecha meinyakteter.
Pei ket nung oli oratsü asoshi documents shitak alirtembo item gate ajanga tetsüng agibo senzüdaktsür, ta Pakistan ketdangser kati ashi.
Aji oda süaka Pakistan nung Afghanistan Ambassador Omar Zakhilwal-i, arrtsülen gate temji Honibarnü terara lapoktsü, ta ashi.
Pai, Hombarnü nisung taintem, manemertem aser tanurtem tashi arrtsü alema jajadaktsütsü aser Pakistan nung aliba Afghanistan nunger par linüki meyipa yoktsü, ta ashi.
Tan ita tetenzüklen Sindh province kübok Sehwan jila nung aliba Lal Shahbaz Qalandar tekülem ki maka nisung 88 tashi taküm samatsüba sülen nungi item arrtsülen aliba gate tem shibanga ayu.
Iba amakba ya Afghanistan nung jenoka aliba kiralongrartem lir, ta Pakistan-ibo tai tonglokja lir. Tekülem kidang lendong agütsübaji Islamic State den sendaktepa aliba Jamaat-ul-Ahrar telungpuri tenüng agiogo.
Pakistan Army-i taoba hopta Afghanistan nung atsükoka aliba telungpur mak yonga aodang Jamaat-ul-Ahrar telungpur aika tepsetogo.