Going Beyond the ‘Monolith NE’ National seminar tenzükogo

February 25, 2017 nü St. Joseph College Auditorium nung anogo ananü National Seminar “Going beyond the ‘Monolith North East’: Understanding the Varying Dimensions.” nung state Angh, P.B. Acharya-i jmbiba noksa nung angur. (Jakhama, (Kohima) February 25, 2017). 

Kohima, February 25 (TYO): Manipal University, Karnataka den Maulana Abul Kalam Azad Institute of Asian Studies (MAKAIAS), Kolkata nungi züngsem tenet aser St. Joseph College, Jakhama senteper February 25, 2017 nü St. Joseph College Auditorium nung anogo ananü National Seminar “Going beyond the ‘Monolith North East’: Understanding the Varying Dimensions” tenzükogo, aser tanü iba sentong nung tongti tesemdangerji state Angh, P.B. Acharya liasü.
Manipal University, Udupi nung pass asür mezüngbuba batch students (1949-51) rongnung Angh, PB Acharya dena lir, aser iba sentong nung pai University anati state indang angatettsü aser angazüktsü atema Nagaland-i aruba atema pelaba olen ka lemsatep.
Angh-i, tashi alirtem teinyaktsü mapaji tashi ajema alirtem den lemsateptsü atema lir, aser linük renloktsü atema India tesem ajak tashi aittsüla, ta ashi.
Paisa, “Iba seminar onük angatettsü tasak, ajisüaka NE State temji telok ka mekümtettsü, kechiyong state shiaji maitsü balala lir,” ta ashi.
Ato kilonser, Narendra Modi-i jembiba o lepshia Angh-i, North-East state tem merenlokra India merenloktsü, ta ashi.
“Nagaland nütsüng lakh 20 nungi graduates lakh 3 dak tema lir, ajisüaka asenok tebilemtsü aika lir aser India mainland nungi pilaa alir,” ta paisa ashi.
“Iba seminar ya ajanga tajangzük karbo angutsü imlar. Tebilemtsütem nungi ajenba ajanga tebilemtsü mokoktettsü,” ta paisa metetdaktsü.
Acharya-i kaketshirtem dang, tashi angutsü bushiang aser tangar nema tashi agutsüba nung yariang, ta ajungshi.
Acharya-i kaketshirtem dangsa, “Tamasa meimchir akumtsüla aser linük senso akumtsüla aser pei mapa nung takoktet akumtsüla,” ta ayongzük.
Iba sentong ya Registrar, Manipal University, Dr. Narayana Sabhajit lenisüba nung agi aser IR, Manipal University, Prof. Arvind Kumar-i tesentepertem pelaa agizükba den seminar nükjidong tongmelang agi lemsatep.
Kasa sentong nung tongtibang nisungtem rongnung Director, MAKAIAS Kolkata, Dr. Sreeradha Datta, Assistant Professor, Manipal University, Dr. Monish Tourangbam. Col. C.M. Kalakoti, Group Captain Dr. R.K. Singh, Kolkata Society of Asian Studies Treasurer, Dr. Arpita Basu aser Principal Tetso College, Dr. P.S. Lorin nunger dena liasü.