Lady Gaga-i ‘The Lickators’ company anema ken o benok

August 14, 2015: 2011 küm London nung aliba ‘The Lickators’ company-i yangluba chiyungtsü ka nung ‘Baby Gaga’ ta tenüng amshiba atema pokerface ken ajanga nüngtugu akümla, Lady Gaga-i ken o benoktsü ta amokmerena liasü.

Ano tan-a kasa company jagi parnoki yangluba ice-cream ka nem ‘Royal Baby Gaga’ ta tenüng agütsüba atema la okatsürtemi ken o benoktsü ta osang agütsüogo.

Iba chiyungtsü tasen ya tesüiba May ita nung Prince William aser kinüngtsü Duchess of Cambridge, Catherine na jala Princess Charlotte asoba tenüng nung yangluba lir ajisüaka Gaga’er okatsürtemi la tenüng tapi-i amshiba atema aitsü.

Okatsürtemi company dang iba tenüng amshiba anenang ta ozüng agütsüogo aser ‘Royal Baby Gaga’ dak sentakba ajak social media nungi anogo 14 tashi nung agienang ta metetdaktsüogo.

The Lickators company nungi Nadine O’Connor-i, “Onoki yangluba chiyungtsü nung Lady Gaga tenüng amshia mali aser la tenüng mashi mamshi….onok meyong chiyungtsü ka sentakba social media nungi endokang ta asüba ajanga onok maoksar. Aji oda süaka yimjung aser akümtsübu sayua onoki iba ice cream ya Lady Gaga dangia techidangtsü atema bener yoktsü aser iba jagi la mekonga akümtsü,” ta Britain osangkaket, Daily Mirror dang shiogo.