Rangoon sülen Vishal Bhardwaj nem INA otsü film ka yangludaktsüner

Kolkata, February 26 (Agencies): India nunger nüngtugu nüjiso bushir Netaji Subhas Chandra Bose’er kinunger Chandra Kumar Bose-i film yanglur Vishal Bhardwaj nem Indian National Army (INA) indang shidakba tatalokba otsü direct südaktsüner.
“Onoki pa nem Indian National Army-i linük asoshi inyakba otsü ajunga yangludaktsüner. Indian National Army indang otsü ajungabo nüburtemi memetet. INA indang nübortemi terabo meteta lir, saka shidakba otsüji masü,” ta Hokolbarnü Bhardwaj indang film Rangoon sayaba tongtibang sentong ka nung Chandra-i osangbener dang ashi.
Hokolbarnü sayaba film Rangoon nung Kangana Ranaut, Saif Ali Khan aser Shahid Kapoor nungeri tongti shilem agir. Iba film otsü ya 1940 tsütsü India nunger nüjiso asoshi raraba tiyalong nung ajemdaker yangluba jilushi ka lir, aser iba film nung INA indanga shisem lir.
“Tanüasüng cinema ajanga lanurtem aika tongteter, aser Vishal-i iba film yanglura nübortemi kanga pela agizüktsü,” ta paisa ashi.
Iba film indang asüngdang dang Chandra-i yamai langzü, “Iba film nung INA indang otsü kanga indangabo masü saka densema lir. Iba film nung linük nüjiso asoshi ‘Netaji’ temeim, koba ochi temeim liasü, iba otsü Bhardwaj-i temeimteper otsü ka ajanga sayu.”