‘Sarabhai vs Sarabhai’ film küma yanglutsü asoshi jembidangogo

Mumbai, February 26 (Agencies): Director aser actor Deven Bhojani shibai wawamenü TV sentong “Sarabhai vs Sarabhai,” anir inyak, pai ashiba agi parnoki iba yanglurtem den iba sentong film küma yanglutsü asoshi jembitepdangogo. Iba show koba 2000 tiyonglen ka nung saya iba nung tangar densema Satish Shah, Ratna Pathak Shah aser Sumeet Raghavan nunger adoker.
Deven-i ashiba agi iba show film küma yanglutsü asoshi jembitep dang, saka kecha meinyaktetba ajanga iba tebilemdangba doktsüadok.
“Onoki iba dak sendakba nung Producer aser otsü zülurtem den jembitepdang, saka kodang taginüba ama onoki iba ajanga tanga ang ka inyaktsü shisadang,” ta Deven-i osangbenertem dang ashi.
Iba show ya upper class Sarabhai kibong ka indang lir, koba nung Indravadan(Shah) aser kinungtsü Maya (Pathak) na jabaso tanobosang Rosesh (Rajesh Kumar) den ki ka nung alir.
Iba show nung ano Sahil (Raghavan) jabaso tambosang aser kinungtsü Monisha shiba shilem Rupali Ganguly-i agir. Iba show nung shilem agirtem balala ajanga kanga nüngtugu aküm.
“Sarabhai vs Sarabhai” ‘web series’ ka ama meyiba arutsü renema lir, aser Deven-i ashiba agi, show nung shilem tasen kar inoka lir.
“Onok ano tangbo teyangludak anungji iba atema jembitsü kanga karara. Taoba mapang nung aliba shilem karbo maneni inoktsü aser tasen kar inoksemtsü. Iba show yakta sayatsü,” ta pai ashi.
Iba mapang kasa nung Deven, pai mezüng direct asüba film “Commando 2” sayatsü asoshi renemshidar. Wawamenü nungi action film-i meyipbaji pa asoshi kanga temelenshi tulu lir.
Deven-i ashiba agi pai meteta aliba aser inyaktetba dang nungi mapa balaka kodang inyakdir pa temolung tagütsüba akümer. Action film direct asütsü pa asoshi tasak masü, kechiyong taoba mapang nunga yamala mesükba TV show “Pukaar” nung shilem agiogo.
“Show nung episode 24 prongla action film tem amaidang lir, aser iba yimya nung film yangluba ni asoshi tetenzüker liasü. Vipul Shah-i iba series producer asü, aser pai temolung lemteta kü nem iba film agütsü. Kü nem mapa tasak ka agütsüra ni kü tajungtiba inyaktsü ta pai meteta lir,” ta Deven-i ashi.
“Commando 2” ya 2013 film “Commando” den tatongtep film lir, aser iba nung Vidyut Jammwal-i tongti shilem agir.