Faith theological college asayamung kaogo

Dimapur, February 28 (TYO): Aam Aadmi party State convenor, Dr S.Amos LKR February 22, 2017 nü Faith theological college asayamung nung tongti tesemdanger liasü.
Pa o jembiba mapang kaketshirtem dang asaya nüngdakba, aser asaya ajanga koda asayar jangratemdaktsür aser tangar peladaktsür, iba indang jembi.
Maneni asayamung ya medemer tasen yangluba aser sempet bushitetba mapang ka lir, ta pai ashi.
Pai pa onük nung Dr. T. Aoi, 1948 küm summer Olympics nung linük ania konang bener arutsüba tatishitsü amshia jembi. Taoba mapangtem den medemdangra tang tashi nungbo tanga northeast state tem dang nungi Nagaland asaya balala nung mezüngbuba jenjang nung alitsüla, saka asenok maparen ajak nung aser asaya balala nung tanga state dang nungi teküpokba jenjang nung lir. Ministry of sports & youth affairs nung sen aruba ajak timi mamshir, ta pai ashi.
Asaya nung shilem agirtem ayongzüka, Nagaland nung AAP sorkar kümtetra asaya balala ajungkettsübaji par party asoshi tongtibangtiba nükjidong asütsü, ta ashi. Maneni asayartem training tajung angutsü asoshi yaritsü. Local football club tem tali tashi itshidaktsütsü aser linük nung mezüngbuba sports University ka lapoktsü ta ashi.