CM menden toktsüba atema mesasar : T.R Zeliang

Dimapur, February 28 (TYO) : Telok kari ozüng alema pa menden yujang ta akhangba sülen pai Chief Minister menden yutsü saka iba atema sasa mebilemer, kechiyong pai party aser nisung meimba nisung ka iba menden agütsü, ta Nagaland Chief Minister, T.R Zeliang-i tanü ashi.
Tanü Manipur kübok Tamenglong nung NPF election rally ka nung jembidang, “MLA temi ni pusema menungitba ajanga masü saka ni Nagaland nung tangar memenepba kin ka nung asüba ajanga chief minister menden nungi anendaktsü” ta T.R Zeliang-i ashi.
“Assembly nungbo MLA temi ni pusema nungit saka kima nung nisungtemi ozüng alema mapa inyaka ni mapa nungi anenang ta takhangba agütsü. Lungkak aitertem azüoktsü atema atema ni nenok Chief Minister Ibobi mesüra Jammu & Kashmir nung inyakba ama Central forces anir arula, saka state nung yimjung aser tesünep lidaktsütsü atema ni menden yutsütsü mulungtet” ta paisa ashi.
“Ajisüaka nenok shisabulua mebilemtsüla, kechiyong sorkar teka tajung nung lir aser tarutsü anogotem kanga tajungba asütsü” ta T.R Zeliang-isa shisem.
Paisa, Manipur nung Hill Tribes indang jembidang, “Nisung ajaki Manipur nung kin ajak sabang ka nung külemi longjemer pei taginübatem atema inyaktsüla ta jembir, saka külem sabang ka mali. Iba atema Naga People’s Front ya külem sabang ka ama aruba lir. NPF ya Naga lisopurtem atema dang masü, saka Manipur kübok Hill areas nung aliba kin ajak atema lir. Taküm elections nung Kuki candidate 3 tashi NPF ticket nung toktepba atema kanga pelar” ta metetdaktsü.
Manipur elections nung NPF candidate 15-i züngsem 60 agi akümba sorkar tentetba nung shilem agitsü atema olen ka ashidang, “Manipur nung 11 buba Assembly nung yimtenren telok kati dangbo sorkar akümtsüsa takok mangutsü aser taruba sorkar tentettsü atema NPF ajanga lemtettsü” ta T.R Zeliang-isa ashi.
Tanü, Tamenglong nungi BJP lennirtem- Khangthonang Panmei, State Executive Member, BJP Manipur aser Pouhotlung, Executive Member BJP & ADC Member, Tamenglong na BJP toktsür NPF nung aden.
Tenati Tamenglong Assembly Constituency nungi NPF candidate, Janghemlung Panmei pusema nungittsü atema NPF nung aden, ta Media & Press Bureau, Naga People’s Front, Central Office sangdong ka nung metetdaktsü.