Manipur nung NPF tarutsü mali : K. Therie

Dimapur, February 28 (TYO) : NPF-i Manipur nung nübortem mapang aser sen amajok nung endoker, kechiyong parnok tarutsü mali ta NPF candidate 15-i meteta lir, ta NPCC President, K. Therie-i sangdong ka nung metetdaktsü.
Manipur nung NPF kijai sorkar akümtsü makok ta NPF candidate temi angateta lir aser ano Manipur nung BJP-i NPF den melokteptsü ta metetdaktsüogo. Ajisüaka, NPF-i mebilemdangi Congress den tokteper. Iba ajanga Manipur nung Naga nunger yimtenren sabang nung jenjang mali kümdaktsür. Yimtenren mapa nung asenoki nübortem tajangzük angutsü atema maongka agütsütsüla, saka NPF indang inyakyim ajanga Manipur rongsenkettsüng mejungi kümdaktsüogo, ta NPCC President-i ashi.
Lanurtem asoshi maongka kecha mali kümogo aser iba jagi NE nungi lanur meyirjang aika tangaleni mapa inyaktsü atema aoer. Asenoki lanurtem atema lenmang lapoktsütsüla aser asen nübur mulungjang nung mim tangatetba magütsütsüla, ta paisa ashi.
Rongsenren mokdangba ya tangatetba tamajung ka lir. Lungkak aitbaji democratic inyakyim ka lir saka rongsenren mokdangba ajanga nübortem okrongdaktsübaji meimchir anema inyakba mapa ka lir,
“Asen tamangba yimsü ajanga meimchir rongsenkettsüng sota ayutsü atema tesayuba magütsür. Ni Khristan ka lir aser ni bilemer alima nung senso tajungtemji Khristantem lir. Naga nungertemi mashilen angateta inyakba atema alimai asenok kanga süngmangseta repranga alitsü ta ni bilemer” ta K. Therie-isa ashi.