T.R Zeliang lenisüba jenjang tajungba kümogo : Yitachu

Dimapur, February 28 (TYO) : Supreme Court-i Arrla 371 A anema oshidang ka agütsütsü lia taoba Chief Minister, TR Zeliang-i ULB indang elections agitsü telemtetba agi, ta Nagaland Education Minister aser Minister in charge of Manipur NPF, Yitachu-i ashi, ta Media & Press Bureau, Naga People’s Front, Central Office sangdong ka nung metetdaktsü.
“Sorkar nung tekolak ka ama, pai linük temzüng nung aliba ama inyaktsü mulungtet aser pai dang aginü asübo, Centre-i teyari agütsüba ama Central forces amshia pa menden metoktsüla. Ajisüaka, pai pa menden bendanga agütsüba ajanga, yimsüsürtem aser Nagaland nung nübortem madak pa lenisüba jenjang tajungba kümogo. Künü anogo pai maneni onok len anitsü ta ni temulung lema ashir” ta tanü Yitachu-i Tamenglong nung NPF nüboyimba sentong ka jembidang ashi.
India, Myanmar aser Thailand tsüngda sentong ka nung adentsü atema pai taoba Chief Minister TR Zeliang den külemi Yangon-i aoba bilemteta jembidang, Yitachu-i ashiba agi, “ni India sorkar indang Act East Policy kanga junga rasa ashi aser iba asoshi South East Asian linüktsü tsüngda shishilembatsü atema gari lenmang tajung tesentaktep alitsüla ta ayongzük.”
Taoba Chief Minister TR Zeliang, den taoba Chief Minister Neiphiu Rio na den pa Myanmar-i oa Naga nunger den ajurutepba aser iba mapang Myanmar sorkar dang Myanmar nung aliba Naga nunger khurettem metetdaktsü, ta tanü Yitachu-isa ashi.
2004 nungi TR Zeliang-i Rajya Sabha MP inyakdang, pai Myanmar ketdangsertem den teti ajurutep aser ibaji ajanga 2008 küm Constitutional amendment ka ajanga Myanmar nung aliba Naga nungertem züngok, ta paisa shisem.
Myanmar nung onoki ajangshiba ajanga Manipur nunga NPF party tera ayangtsü atema onoki mulungtet. Hill areas nung NPF-i nübo teimba ngutetra, NPF-i Article 371 C mapa küma inyaktsü atema shilem tulu agitettsü. Tang Manipur nung aliba sorkaribo tenemlen alirtem atema balaka meinyaktsütsü, anungji asenoki Hill districts nung takok angutsüla, ta Yitachu-isa tesentepertem ayongzük.
“Manipur nung NPF-i dang yimjung aser tesünep bener arutettsü. NPF-i Manipur nung democracy inyakyim bener arutettsü. Onoki puitiotsü nung otsü tasen ka yanglutsü atema mapa inyaker. Tanü yangi adenshia alirtem ajak ya iba putiotsü nung dena lir, anungji nenoki iba putiotsü nung dendaktsütsü atema tangartema anir arung” ta paisa ayongzük.
Iba sentong nung NPF party Spokesman, Achumbemo-i NPF President aser Nagaland Chief Minister, Dr Shurhozelie Liezietsu tenüng nung salem osang metetdaktsü.
Achumbemo-isa nübortem dang BJP nem vote magütsütsü atema ayongzük.
“BJP aser parnok den yaritepba teloktemi India tesem balala nung Khristantem anema mapa inyaker” ta pai ashi.
Achumbemo-isa, Chief Minister Ibobi Singh-i lisopur aser Manipur nung nübo agi tangar memenepertem anema mapa inyaker anungji, Congress nem vote magütsütsüla, ta ayongzük.
NPF-i lisopurtem aser Manipur kübok Hill area nung alirtem taginübatem atema nokdaker, anungji nenok asoshi nokdakba aser teti nokdaktsüpur telok- NPF nem vote agüjang, ta Achumbemo-isa ayongzük.