Dimapur nung Aortem telongjem tashi itshitsü renemshi

Dimapur, February 28: Tanü asenok teraksa putu nung alir aser teraksa adokbaji tangar shinga ajanga masü saka asenoki raksaba lir. Tanübo asenoki pei pei ajungtsü dang bilemer anungji telok, yimten, arogo ajungtsu bilema inyaker kanga ajema kümadokogo ta Rev.L.Kari Longchari metetdaktsü.
Pai iba o ya tanü State stadium Dimapur nung Ao Senso Telongjem Dimapur (ASTD)-i ayongzükba tenüngsang agütsüba sentong nung jembidang shia liasü. “Asenoki alima melenshitsüba aser yanglushitsüba ya tangar nem melenshidaktsütsü indang jembi nungbo kodanga temelenshi marutsu, saka asenoki Tsüngrem dang sarasademer asensasa asen atep nungi aser asen kibong nungi temelenshiji tenzükra, indangjiang chichiba temelenshiji arutsü,” ta Rev.Kariisa metetdaktsü.
Dr. Clark Ao limai arudang, Aor nütsüng meyirijang ter pongo shi dang liasü saka tanübo Aor nütsüng lakh ana jungogo. Ao kin ya lepteptsüngtep, ayawara, tashidak aser mashimemetetba agi tesamar liasü saka Tsüngrem taochi agi Yisu Khrista osang tajung arua kümzük. Ajisüaka, Ao kini Tsüngrem sendok aser alima yimten aser rongsen dak tenük ranglok, ibayongji tanü asenoki alima kanga mejungi raksatsüogo ta tanü Aor tia indang ken o ka paisa metetdaktsü.
“Nenok lenirtem tongpang nung kanga dang belemogo. Temulung ajema teli, nenok teyarir aser temelener aika dang Tsüngremi renemja lir. Aor lanurtemi taküm dena tenla agütsüogo, ano nisung meyirijang aikati taküm tenla agütsütsü renema lir, tasü ittang, temulung ajema teli, Tsungremi nenok anitsü. Meimchir tashi, ain mesüra political power agi masü saka Tsungrem tanüla nem Aor anidaktsüdi,” ta Rev.Kariisa metetdaktsü.
Ao Sendeni 2003 küm nungi Nagaland Municipal Act 2001 nung ya temelenshitsü lir, anungji ibaji memelenshi tashi municipal election magidaktsütsü ta nokdak. Küm 15 tashi rara arur tang asenok Dimapur sensotemi aji shitaka ta angateta nungit aser Naga nunger ajungai JCC aser NTAC leniba kubok tanü iba tongpang nung takok ngua arudagi ta JCC Convenor aser ASTD tir Wb. Supu Jamiri metetdaktsü.
Tang tashi nung asenoki Dimapur Police Commissioner aser nisung khasetertem suspend sütsütsü kanga lir saka itemji government-i mataloktsüi lir aser ano nisung dak akhaba ken o bushisüngdangtsü asoshi nisung asem agi akümba Enquiry Commission ka shimtsü takangba agüja lir ta paisa ashi.
Tang ya Naga nungertemi Aortem dang kanga pelar, anungji ano parnoki asenok dak temulung lemtettsüsa kechi tajung aser kechi ochi, itemji maneni inyaka aotsüla ta ASTD tirisa ashi.
Kasa senden nung Dimapur Watsü Telongjem mendenbulai jembidang, ” tawa government-i ULB election kechisüdir süaka agitsü merangba ajanga asen jabaso asem taküm samaogo, iba asoshi jashia mang ayimer,” ta lai metetdaktsü.
“Tanü aseni shimtetba purtemi asen ola mangashir, Ibaji tekümdangtsü ka lir. Tanübo joko asenok asoshi ochishir aser Tsüngrem tsübuba nisung shimdi aser asenok rongnung yim aser tzükong telemsa kecha melili,” ta laisa ayongzük.
Tanü iba sentong nung Ao Senso Telongjem Dimapur, Chumukedima Ao Senso Telongjem, Medziphema Ao Senso Telongjem, Dimapur Urban Federation nung Aor mendenbubatem telongjem, Dimapur Ao GBs’ Union Dimapur, Dimapur Ao Lanur Telongjem aser Ao Kaketshir Telongjem, Dimapur teloktem nungi nisung kakati tepela aser tajungshi o jembia liasü.
Iba senden nung tawa ULB election nokdangba mapang asür nem aküm tetushi agüja minute ana ola madoki sarasadema liasü. Iba sentong nung Dimapur Watsü Telongjem aser DABA choir nati ken kaka aten aser Dimapur Area Ao Pastors’ Fellowship purtemi Naga lima aser nübortem asoshi sarasademba mapang ka agia liasü.
Iba sentong ya DABA nung sannüker Rev.Moang Lemduri sarasadema tenzük aser Rev. C.Walu Wallingi sarasadema tembang.