Economics & Statistics Dept-i Parliamentary Secy. pelaa agizük

Kohima, March 01 (TYO): February 28, 2017 nü DES conference hall, Kohima nung Economics & Statistics Department-i Economics & Statistics Parliamentary Secretary tasenba, Tovihoto pelaa agizükogo.
Iba sentong nung jembidang Tovihoto-i, sorkar atema Department of Economics & Statistics ya tongtiret lir aser iba Department-i nodal department ka ama khuret tulu bener inyaker, ta metetdaktsü.
Paisa, iba department-i tajungtiba nung inyaktettsü atema ketdangsertem aser staff tem teyari leniba nüngdaker, ta ashi.
Paisa, directorate building tasenba tembanger dang lir, ta metetdaktsüba den külemi Department dang state nung jenjang tajung alangzüktsü atema longjemer nendaka inyakdaktsüner, ta ajungshi.
Department indang presentation tatsüka agütsüdang Economics & Statistics Secretary, Kevilenuo Angami-i, 2009 küm sorkari iba Department ya data atema nodal agency ka lir ta sangdong aser state aintsü atema maparen balala inyakdar, ta ashi.
Department maparen balala metetdaktsüdang Director, Y.Sacheo Ovung-i, Economics & Statistics Department ya grassroot level nungi data bendenba department ka lir, ta metetdaktsü.
Paisa department-i ajangshiba tayongzükba balala metetdaktsüba den külemi tang tasen shimba Parliamentary Secretary lenisüba kübok Department tali tashi itshitsü imlar, ta ashi.
Pai Parliamentary Secretary nem tenüngsang agutsüba den külemi Department-i akokba tashi agi pa den amalitepa inyaktsü, ta metetdaktsü.
Iba sentong ya Joint Director, R. Kronu lenisüba nung agia liasü.