PHED-i Er. J. Walter Longchar den tepila sentong agi

Feb. 28, 2017 nü PHED Directorate Office, Kohima nung Addl. Chief Engineer, Er. J. Walter Longchar-i Dept. ketdangsertem aser staff tem den tepila o jembiba noksa nung angur. 

Dimapur, March 01 (TYO): February 28, 2017 nü PHED Directorate Office, Kohima nung PHED-i mapa nungi anisüngzüker, Additional Chief Engineer, Er. J. Walter Longchar den tepila sentong tajung ka agiogo.
Er. Longchar ya 1985 küm SDO ka ama Dept. nung inyak aser arishi küm agi tonga (Superannuation) Addl. Chief Engineer inyaka lia mapa nungi anisüngzüker.
Iba sentong nung tang tasen shimba Commissioner & Secy., Maongwati Aier, IAS den Department nung tongti ketdangsertem aser staff tem aden.
Iba sentong nung jembidang Er. Walter Longchar-i, iba department ajanga nüburtem tenzüktsü atema Tsüngremi pa nem maongka agutsüba atema pelaba lemsatep, aser tenzükba wadang nung alidang ketdangsertem aser staff temi pa nungitba atema parnok danga pelaba lemsatepa liasü.
Paisa, tesüiba kümtem nung Department-i lenla ajaklen, talisa personal management nung junga inyaktetogo, aser tarutsü nunga yamaji maneni inyaktsü imlar, ta lemsatep.
Commissioner & Secy.-ia, Er. Longchar-i mapa tajung inyakba atema tenüngsang agütsüba den külemi sorkar mapa nungi anisüngzükba sülena maneni nüburtem tenzüktsü imlar, ta metetdaktsü.
Department tenüng nung jembidang Chief Engineer, Er. Kevisekho Kruse-i, Er. Longchar-i küm 32 jungnüa Department tajungtiba agi tenzükogo, ta metetdaktsü.
Paisa, “Er. Longchar anisüngzükba ajanga Department nung tapok ka apatsü aser onoki pa kanga menungratsü,” ta shisem.
Kasa sentong nung pa melenzüker Addl. Chief Engineer, Er. Yhusinlo Tep aser Executive Engineer aser Association of PHE Engineers Tir, Er. Khetoi natia jembi.
Ano sentong nungsa Er. Mezivil Kikhi, SDO aser PHED staff temi tepila salem ken ka aten aser Er. Repang Longkumer, SE (M&I)-i tepela anküp o jembia liasü.
Tepila sentong ya WSSO,PHED Director, Er. K.G.Sumi lenisüba nung agia liasü.